Online Reporter
Sikumbuzo Dabengwa
Zivaliwe mfundi. Umbuzo munye. Impumela yomhloliso ngamunye ngamunye ingabe imi kanjani kusifundo sinye ngasinye?
Kube kuhle yini? Kumbe indoda ibigeza icwebezela iqhuba abanye. Phela sangena kula amaviyo enza lezo ezeSayensi. Sasicabanga ukuba hatshi konke kumi ngohlelo.
Bazama ukusixwayisa ngokuthatha lezi izifundo ikakhulu nxa zilele kuzinombolo. Namhlanje olunye selugedla amazinyo.
Kambe yimiklomelo engatshengiswa abazali leya? Bona bala ukuxuba lala alula bewabona engaqakathekanga.
Namhla sithini selokhu imiklomelo isengama ngaphansi kwamatshumi amabili ekhulwini. Batayi! Kuzakuba lokugedla kwamazinyo sibili kuleyo ndoda, kwazise inengi lalahla okulula ladidizela lasindwa ngokudalelwe abanye.
Kuhle-ke bafundi ukukhetha kuhle silandele lokhu esikwenelisayo kanye lesikuxwayiswa ngababalisi.
Ukungazi kufana lokufa batsho beqinisile abadala. Sekukude emuva, sekukude phambili. Nxa isimo sokuhlola sizaqhubeka kanje kutsho ukuba amajaha kuzafanele abophe ziqine izinkalo.
Buka lapha:
Umfundi wenze iphutha emihlolisweni yokuqamuka komnyaka eyiyo engumfanekiso yalokhu azakuthola ekupheleni komyaka.
Imiklomelo iphansi kukho konke akubhalileyo. Nxa bebukisana izincwadi zabo, omunye umfundi uyabuza. Nansi imibuzo.
a) Imiklomela le iphansi bangane. Kambe lina ngapho kini kulungile. Mina ngidobhe zabambili kuphela. Okunye lokhu kubi, kubi bakwethu. Senze njani? Abanye bathi :-
i) Lokhu akukhulunywa mngane. Sikhala okufanayo. Okufanele sikwenze yikubuya sizefunda labanye njengoba umphathisikolo esitsho ukuba kuzabe kulezifundo. Asivali.
ii) Uvuna okuhlanyeleyo mngane. Satsho ukuba asekeleni ukudlala lokugamanxa emakhulusini kuchithwa isikhathi sokubala.
iii) Akulahlwa mbeleko ngokufelwa. Ithuba lokulungisa imiklomelo lisasekhona. Indoda ingabopha ziqine ingaphuma lokubambekayo.
iv) Asibokhetha kuhle izifundo zethu. Mina lokhu engakukhethayo kuphumile bangane. Ngifa lakho, ngizakucolisa ngiphile ngakho loba nini.
Inkulumo engaphezulu, ilethwa ngumfundi olesimilo esinjani?
Ncoma kumbe usole isimilo somunye lomunye ukuze olandelayo asizakale kuhlupho olufanayo.
Lanxa kungaba njalo ekuphileni siyafundiswa ukuba lethemba kukho konke esikwenzayo. Amaphutha ayenzeka.
Kuhle ukuzinikela ukulungisa. Ukuwa ubhazalale yimpilo. Ukuvuka uzithintinthe yingqondo. Ungavumi kuze kubonakale ukuba uwile. Vuka, uzithintithe, ugeze, ubangene.
