Online Reporter
Akhona amagama atsho okunengi lilinye eSintwini. Emihlolisweni silakho ukuhlolwa sivivinywa ukuba siyenelisa yini ukuwachaza. Siyavivinywa, kudingwa ukuba kubonakale ukuba siyenelisa ukuwasebenzisa na emitshweni ecacileyo, eveza ingcazelo yalelo gama. Umfundi kufanele abone ukuba uchaza igama kabili, eletha izinto ezimbili ezingafananiyo. Kufanele ananzelele njalo ukuba nxa kubuzwe ibizo kufanele ingcazelo itshaye kubizo.Uma bedinga ingcazelo yesenzo umfundi kachaze ngesenzo.Asikhangele amagama alandelayo.
Umuzi
a) Ikhaya elilezakhiwo zokuhlala abantu.
b) Itshatha elimnyama emzimbeni ozalwa lalo.
Isimbo
a) Imali ekhitshwa enyangeni kuhlawulwa umuntu engakelatshwa.
b) Insimbi ecije nxa zombili esebenza ukugebha amagodi atshonayo.
Umkhonto
a) Isikhali sokulwa kuzingwazi, esicandulwe sacija phambili.
b) Imali ehlawulwa enyangeni emva kokwelatshwa.
Ilanga
a) Usuku.
b) Indingilizi enkulu ekhanyisa emkhathini emini libalele.
Inkomo
a) Isifuyo ekhaya esikhulu esisengwayo kodwa silempondo.
b) Umkhuhlane wokulunywa uthwebuza ubangelwa ngumungula.
Impukane
a) Inyama esala idikiza lanxa inkomo ehlatshiweyo isifile yahlinzwa.
b) Isibungwana esiphaphayo esithanda ingcekeza ebolileyo.
Ngithemba sizaqhubeka sichaza amagama
anjengala ngendlela eyiyo bafundi.
