Online Reporter
Sikumbuzo Dabengwa
Umbuyiso ngumkhuba obuqhutshwa izolo kukhangelelwe ukuletha umoya womuntu osedlulile ekhaya.
Abendulo babekholelwa ukuba umoya womufi uzulazula phandle ngakho kufanele ubuyiswe umnikazi muzi eze ukuzogcina imuli labantwana ekhaya. Wonke umuntu ofe elomuzi ubebuyiswa, ingabe ngumama kumbe ubaba. Umbuyiso ubuthatha amalanga amathathu. Wona wawuqala ngokumenyezelwa njengomtshado kusaselesikhathi.
Umuntu ubebuyiswa ngemva komnyaka edlule. Kwakuzila ukuba abuyiswe ngamabele awalimayo. Abosendo, izihlobo zegazi zazihlangana ngemva kokumenyezelwa kwalelilanga balungiselele ukuqhuba lelisiko.
Bekukhethwa umaphathinkezo kubobabakazi. Umaphathinkezo ubecupha amabele amalutshwane aye lawo ekucineni kweguma abikele abaphansi ngomsebenzi kasibanibanyana ozayo.
Amabele la asezahlanganiswa lawezinye izihlobo kuyiwe gwaqwa, kuphekwe utshwala obuzakwenela umthimba wonke. Labomakhelwane babephathisa ekuphekeni.
Ilanga lokuqala kwelombuyiso kwakulilanga lezinyanya, elamadlozi. Abosendo nxa basebefikile babehlangana ilanga selibantu bahle ngolweSihlanu baye elibeni likamufi.
Bahamba lemiqokwana yamaqhaga amancane. Amakhulu bawatshiyela umkhosi omkhulu wakusisa ngekhaya.
Sebezathi- ke sebeselibeni kubikwe ngumaphathinkezo uhambo lwabo. Kuyachithwa igwayi lotshwala phansi kuhlatshelwa ingoma yezinyanya u “Woz’ ekhaya.”
Imbuzi, ihlahla phela iyamiswa elibeni. Iyathelwa ngotshwala ize ichame okuyikho ukuvuma kwabaphansi.
Kuzakuthi sebebuyela ekhaya bahambe behudula ihlahla kumbe baqhube imbuzi leya, ihlahla. Bacula besenza nje baze bayefika bembizela ekhaya ongowabo.
Bafika ekhaya bafuze kancane indlu kamufi sakuyidiliza uphahla kodwa nxa kungesebenzayo iyenzelwa lumkhuba itshiywe ukuze iphathise abekhaya.
Sekuzagidwa- ke kuhlinzwe imbuzi kudliwe. Lilanga lezinyanya elokuqala.
Nansi imibuzo.
1. Ngubani umaphathinkezo kwezombuyiso?
2. Umbuyiso uthatha amalanga amangaki?
3. Utshwala babuphekwa ngobani njalo obabuqakathekile babufakwa ngaphi?
4. Chaza :- Kuyini
a) Ihlahla? b) Abosendo? c) Ilanga lezinyanya?
Asiqhubekeni kwelizayo bafundi.
