shloboe boe
Sikumbuzo Dabengwa
Sengikuphi lapha manje? Sengiphethwe yindlala. Akusela muntu ophatheke ngami. Bonke engidinga ukuhlobana labo abasanginamatheli. Bonke sengibanukela.
Ungathi sengilephunga leli abathi luhlofu. Ikhwapha, umlomo kanye lezihlangu zami konke sekuzwakala ngephunga. Emlonyeni lapha lanxa ngixubhe ngomuthi wansondo, kwala kulokhu kulesibhoho esiphumayo ngoba ngingahlalisekanga kuhle emzimbeni.
Ikhwapha asikhulumi. Ngigezile ngaguxuza ngaze ngaziqhola langamakha kodwa nxa ngibhekana lalimpilo lisuka likhiphe okwalo samuntu ongagezile.
Izihlangu Batayi, sekuzinhlanzi othi ukhangele eSigodini zona zibe angathi uqonda eGwelutshena le eNkayi. Inhlanzi ekhamise umlomo uyayazi?
Yiso leso esami isicathulo kwazise ubaba wafunga wagomela wathi ngidle lokho engilakho. Lokho kuyikungazisa ukuba akulasizo abazangipha lona njengalokhu sengikhume phansi ngomlomo.
Selidume ledlula elemihloliso. Mina njengomfundi owayengakhuzeki sekukude emuva kube kude laphambili. Angiphumanga lalutho.
Ngehluleke kukho konke. Akukho lokukodwa engithole khona ucezu kodwa lokhu. Esikolo ngangifika ngesami isikhathi.
Izigqoko zesikolo ngangintshintsha endleleni labangane bami. Sasibhoda lezitalada. Sasibanga umsindo labanye bami. Sasingela ndaba lemfundo ngitsho lakancane.
Ekubhaleni sasifika silale siphume sidlephadlephe okungayi ngaphi. Namuhla izimpumela zikhomba ukuba sasizidlalela. Angiphumanga ngitsho lokukodwa vho.
Abazali sebedelile. Kubaqedile phezu kwalezi izenzo ababezizwa ngelanga lokuhlolwa kwezingwalo zabafundi. Bathi kuhle indoda izibonele ngoba uvuna lokhu okuhlanyelileyo.
Nxa sekunje sekufanele ngiyelotsha ebazalini. Kufanele ngincenge ngomoya omuhle. Mhlawumbe bangaguqula ingqondo bangiphe ithuba lokuphinda. Akhona amaphutha njalo abadala bayatsho labo ukuba umuntu akahambi engakhubeki.
Kuzafanele sihlale phansi sikhulume. Mina ngiyavuma ukugebha igodi ngigqibele ngikhafulele amathe ngaphinda. Angiphindi.
Online Reporter