shloboe boe
Sikumbuzo Dabengwa
Nangu umama ungena emasimini akhe asebukeka esevuthiwe sikhangelela umumbu kanye lamazambane. Uyahaluzela engena ephendla indlela kwazise kwenile lapha emaceleni kwensimu. Utshani buziba indlela.
Isivalekile indlela bandla. Ungeke watsho ukuba bekulugwadule izolo likabula lokhu. Akungeneki bo! Umumbu lawo ensimini lapha usukhulile wabamude uthinta eMahalihali. Umama uthi gaga abone nansi inqumbi yomumbu eduzane lokuphela kwendima yakuqala.
Umumbu uyinqumbi laphaya angathi utshiywe ngumuntu osayageca omunye. Ethuke uMaNdlovu amemeze umkakhe obesalele emuva le.
Nampo be duma lensimu yonke yeka. Ingqondo ithi bekusanda kwenzakala kanti phinde. Isela lingene izolo. Lingene latshaya labhuqa. Belibhonyula kuphela. Belingathathi omncinyazana. Belikhangela lonke ihlanga elikhulu.
Nxa esitsho uMaNdlovu amasaka amabili ayanela isilinganiso somumbu owebiweyo ensimini lapha. Ubaba usezonde usegan’ unwabu.
Usedlathuzela lapha esiyale lale. Ukuhlola okunje kubuhlungu ngoba nanti lezambane lalo ligejiwe okobutshapha.
Umagebha ubehlasela amanye atshiye amanye engaquntwanga samuntu obejahile esesaba uhlamvu lombhobho.
Kumahlikilili nje okuzwisa ubuhlungu.
UmkaMaNdlovu unxapha afunge kokuphela ukuba aluba ubeke walithola lelisela ubezalibonisa into yamehlo.
Imibuzo
1. Ubusela obunje bukhombani ngalesisikhathi sehlobo?
2. Kuyini okungabe kubangela ukuntshontshwa komumbu wabantu kulindawo?
3. Umantshontsha yena singathi ngumuntu owayesizwa njani ekwenzeni isenzo lesi.
4. Kuyini okungabe kwabangela ukukhohlakala kweyinye inqumbi yomumbu?
5. Ukuzonda kukamnka MaNdlovu kukhomba ukuba abantu benzani emva kokuntshontshelwa emasimini abo?
6. Kunguwe sekuntshontshiwe ngakini wawungezwa njani?
Siyananzelela- ke bafundi ukuba isikhathi lesi yisikhathi esinzima kwabanye. Abanye bazicelela ngobuvila besekela ukuya endimeni labanye.
Ithumbu yilo elikhala kokuphela kuze kuthi yana boleka ungaphiwanga. Asisebenzeni gadalala ngoba impilo inzima phandle lapha.
Online Reporter