Online Reporter
Sikumbuzo Dabengwa
Nanka amajaha esadalala esibayeni. Luthuli kubanjiswana isifuyo ukuze sihlatshwe emahlaba nkomo. Omama bayaphithizela lezitsha zokwemukela igazi lombendeni.
Bathi bangaqeda ukuhlinza umninimuzi abaphe amantshontsho. Le yinyama ehamba isikwa, intshontshwa emgogodleni wesifuyo.
Sebezakuthi sebephuma kuleli ikhaya baphume lesibongo esihle bayephathisana lamakhosikazi ekhaya.
Nanka amanina asephakathi kokucutha izinkukhu. Zinengi zona. Amakhulu evayo. Bane laba omama abaselimeni lokucutha izinkukhu kuleli ikhaya. Isimanga, banengi omama abafisa ukuphathisa kulo umsebenzi .
Lokhu kudalwa yisibongo abasiphiwayo nxa sebegqibile lumsebenzi. Basuka omama bethwele isidumbu senkukhu, ezangaphakathi sibalisa labontamo kanye lenyawo zenkukhu.
Othanda amakhanda enkukhu laye uyawaphiwa ayexhwathisela obathangithini bakhe ngekhaya, nxa engawadli. Konke lokhu kuyikubonga ebantwini nxa kuthe kwaba lokusebenzelana ndawonye emakhaya ethu.
Buka uhlolisise uphendule imibuzo:
a) Kusemkulwini kagogo, kufika isethekeli siletha umbiko wezakhamuzi. Ekuvaleliseni, inina lalapha ekhaya lidobha umganu limphakele umxhanxa oseziko.
Siphume isethekeli esingumakhelwane sihambe. Ntambama umganu uphenduke lomntwana usubelethe umfushwa wendumba omncinyazana.
Imibuzo:
i) Abantu laba baphilisana njani?
ii) Isethekeli lesi siveza isimilo esinjani?
iii) Kambe aluba isitsha seza sigenqeza besingathini ngesenzo lesi. Phana isizatho sempendulo yakho.
b)) Bakhona abantu okuthiwa ababongi. Labobantu ngabenza njani kwabanye abantu?
c) Omanqomfi, abancweba ufudu lubhense, ngabangabongiyo bencitshana. Bakwenza njani lokhu? Xoxa.
d) Othi angaphiwa ulutho ngesitsha angasibuyiseli, aphethe esezisebenzisela lesiya sitsha , cala celeni! Unjani yena?
Asinanzeleleni bakwethu. Kuhle ukubonga lokubongwa. Ungadli wesulele phansi njengenkukhu.
