Online Reporter
Sikumbuzo Dabengwa
Kuyaphithizela ezikolo lapha. Yisisanasana umtshado wezinja. Kuyale lale. Ngumzali wonke lomntwana kanye lababalisi. Indaba esegudwini ngeyokubhala komntwana lonyaka. Kambe yiziphi izifundo umfundi afanele azikhethe ukuze athi nxa esezibhalile zimsize zimuphe ezintathu ezibumba ezizalandela kubanga lesithupha.
Kukhona ukukhulumisana ngokubhalisa lokhu. Kukhona laba abathi umfundi kenze abona yena kuzamlungela.
Kukhona njalo labangekho lapha abatshiyela konke kubafundi. Siyabonga ngalesisikhathi ngoba siyafundiswa ukubamba isandla somfundi sibabili.
Umzali uzathi ukusibamba asigagadlele. Umbalisi laye uzasibamba asigagadlele. Sonke sobathathu sobambana kube khona ukubonisana, ukukhulumisana kanye lokufundisana. Kakho omdala. Kakho omncane. Sonke siyehlelana silalelane.
Nangu umzali uhlezi lomntwana kuyasetshenzwa la. Kuhlutshwa indlubu ekhasini namhla ngezifundo ezizathathwa ngumfundi. Abanye baze batsho ukuba kuzamele baphanane amathuba okuyacabanga ngasekhaya. Kuhle lakho ukuba umfundi lomzali bathathe isikhathi sabo. Umfundi yena nguye ohamba phambili ngezifiso zakhe zonke.
Asikhangeleni ingxoxo elandelayo.
Kusesikolo ngemva komhlangano omkhulu kubazali labafundi ndawonye lababalisi. Umama ulande usane lwakhe olufunda luhlala esikolo. Bayaxoxisana ngokuzafunwa ngumfundi ekukhetheni izifundo zakhe umfundi.
Umzali ulalele umntwana ekhuluma ekhetha lezo izifundo. Umlandu alawo lapha umama ngowesivumelwano ezimalini. Umfundi konke akukhethayo ekucineni kulokunanzelela ukuba isikhwama sabo simi njani.
Bayaxoxa
Umzali: Kambe Sipho uzakwenelisa yini ukuphuma lezifundo lezi osuzikhethile lapha?
Umfundi: Mama, mina ngizimisele lonyaka ukuba ngisebenze gadalala. Akusekho ukudlala.
Umzali: Ngiyajabula mntanami nxa sekulokuguquka komumo empilweni yakho. Qhubeka kanje!
Umfundi: Ngizazama mama. Ababalisi bonke bathi sengisenza kuhle kulakuqala.
Imibuzo
Kambe laba ababili batshengisani ekuxoxeni kwabo kungakancindezelwa izifundo phansi ngumfundi?
Umzali nxa elalele angezwa njani ngalo umfundi okhuluma kanje?
Umfundi yena utshengisa ukuzimisela. Veza izizatho ezimbili ezikhombisa ukuba uzaletha imiphumela emihle!
Siyabonga ngempilo elokubambisana phakathi komzali lomntwana kanye lababalisi. Nxa kubunjwa ngobuthathu bonke kuba lobubele. Umfundi ukhetha kuhle abuye aphumelele kuhle kuzifundo. Asibonaneni kwelizayo bafundi.
