Online Reporter
Fungai Muderere
ISIZUNGU sesizaphela kubathandi labalandeli benguqu kuligi yeZifa Division One kumhlubulo ongezansi yelizwe nanko abaphathi bomdlalo babika ukuba inkundla zivulwa ngeviki lakuqala ngoMabasa.
Amaqembu aselungiselela okokucina njalo amanengi aphezulu kokudinga abadlali abatsha lokuthengisa abanye. Iligi le loba ikhangelele ukuthi ivule isizini yalonyaka, ihlaselwe yinkinga enkulu, eyokuswela usekelo lwemali.
Kuminyaka edluleyo, amaqembu ancintisane kungela mali njalo akhona ehluleka ukubhadala abadlali lokuqedisisa imidlalo ethile.
Isikhulumi seligi le, uBlessing Mbwanda ubikele iZimpapers Sports Hub ukuthi basalungisisa okuthile kodwa amaqembu asevumelane ukuqala umdlalo ngoMabasa.
Uthe bazethula ngosekelo lwemali olukhona.
“Isizini yethu ka-2025 kumele iqale ngeviki lokuqala kuMabasa. Mayelana ngamalungiselelo ethu, engingakutsho yikuthi kuhamba kakuhle okwakhathesi.
“Sisaqedisa okunye kumalungiselelo njalo silabo abazimisele ukuthi basekele ngemali kodwa angeke ngibike amabizo okwakhathesi. Lusekelo olukhulu engikhuluma ngalo. Kulokukhulu okuzayo,” kutsho uMbwanda.
Kumaviki amabili adluleyo, iligi le yenza umkhosi wokubonga abadlali, eQueens Sports Club. Umqeqetshi weZPC Hwange uMabelo Njekwa waphiwa isicoco sokuba ngumqeqetshi owenze kuhle kulabo bonke.
Ngaphansi kukaNjekwa iqembu leZPC Hwange lanqoba isicoco kodwa kalidlali kuligi yePremier Soccer League ngoba indawo yayo yathengiselwa iqembu leMWOS eliseNorton.
Kumcimbi lo, uphakamisa labadlali beZPC Hwange abagoqela unozinti uHarmony Nare, umgadli uJustin Kaunda lo-Israel Mkahanana. Abanye abadlali abathole izicoco nguTinotenda Chitete, Nhlanhla Fumpano (Nkayi Unted), Tatenda Ushe loWilfred Nzondo abe-Casymn, Hopewell Moyo (Zimbabwe Saints), Mbongeni Minezhi (Bulawayo City), Micheal Tamela (Mainline) loTrevor Mugwagwa (Zebra Revolution).
Amaqembu amatsha kulisizini yiBulawayo Chiefs, Arenel Movers leHwange ezivela kuligi yePSL.
Kukhangelelwe ukuthi kuvuthe inkundla kumncintiswano lonyaka ngoba amaqembu abalisa iCasmyn, Nkayi United, Bulawayo City, Zimbabwe Saints le-Adachi athembisa ukuthi azatshengisa umdlalo osezingeni eliphezulu ngoba ehlose ukunqoba.
Amanye amaqembu azaletha umncintiswano yiTalen Vision leZebra Revolution.
