admin
Nkosilathi Sibanda
UMQEQETSHI weqembu lesizwe kumdlalo kanobhutshuzwayo uZdravko Logarusic wethule amabizo abadlali afuna ukuhamba labo kumkhankaso wenkezo yeCosafa eSouth Africa kodwa watshiya intshantshu zabadlali be-Chicken Inn.
Kuyasolisa okwenziwe ngumqeqetshi lo ngoba kubadlali abalitshumi lanhlanu, uyehluleke ukucupha ithalenta elikuma-Gamecocks, iqembu okungathandabuzwayo ukuthi libuthelele ingcitshi zomdlalo.
IChicken Inn, esiqede amasizini amathathu indiza phezulu kwelogu, ibalelwa kulezo ezenze kuhle, kusegcekeni ukuthi ayizange ibesengqondweni kaLofarusic ngesikhathi ekhetha abadlali.
Pho nguye okhethileyo?
Ukucubungula kwephephandaba likazulu kuveze ukuba umqeqetshi lo labancedisi bakhe, benze iphutha elingasoze lithole uxolo kubalandeli bomdlalo. IChicken Inn, iqeqetshwa ngu-Joey Antipas okunguye owalolonga inengi labadlali asebebatshazwa kumaqembu esizwe. Kubadlali abatshiywe nguLogarusic abatshisayo kuChicken Inn, babalisa uDonovan Bernard, uXolani Ndlovu, uClive Dingai, uShepherd Mhlanga lo-Obriel Chirinda.
Akula umlandeli wenguqu ongayala ukuthi abadlali laba basemnyakeni yabo yobungcitshi enkundleni.
Ukutshiya abadlali laba, kuzanikeza umqeqetshi wama-Warriors udubo, ikakhulu nxa ingadliwa ithimu yakhe kumidlalo yokuqala.
I-Cosafa idlalwa kusukela mhlaka 7 kulinyanga. Loba ekhethe abakhe, kulilungelo lakhe lumqeqetshi ongasachazanga ukuthi kungani etshiye abathile, ababonakala bedlala ngcono kulabakhe.
Kumbiko wayo ngabadlali abaqanjwe ngumqeqetshi, inhlanganiso yeZimbabwe Football Association ithe isinqumo esithethwe ngumqeqetshi labasekeli bakhe kumele sihlonitshwe, sisekelwe njalo.
“Abaqeqetshi bayazi abakwenzayo yikho sibathembile ukuthi basikhethele abadlali abazamela isizwe kuCosafa.
“Bakhethe abadlali laba esikhangelele ukuthi balolonge anduba siphume leqembu elizancintisa, okwamanje asikaqalisi ukulolonga.”
Nansi ithimu kaLoga:
Onozinti: Washington Arubi (Marumo Gallants), Nelson Chadya (Ngezi Platinum Stars), Martin Mapisa (Zamora CF)
Imvimbi: MacClive Phiri (Sekhukhune United), Kelvin Moyo (Nkana), Carlos Mavhurume (Caps United), Andrew Mbeba (Highlanders), Lennox Muchero (Yadah Stars), Godknows Murwira (Dynamos), Qadr Amini (Ngezi Platinum Stars), Malvin Mkolo (Bulawayo Chiefs), Jimmy Dzingai (Nkana)
Esiswini: Blessing Sarupinda (Caps United), Perfect Chikwende (Simba SC), Tatenda Tavengwa (Harare City), Shadreck Nyahwa (Dynamos), Brian Banda (FC Platinum), King Nadolo (Dynamos), Nyasha Dube (Little Rock Rangers), Jonah Fabisch (Hamburger SV), Ovidy Karuru (Black Leopards), Richard Hachiro (Caps United)
Abagadli: Farau Matare (Bulawayo Chiefs), Knox Mutizwa (Lamontville Golden Arrows), Evans Rusike
Online Reporter