Online Reporter
Ethel Ncube
UMHLABELELI othandwa linengi uMadlela Sikhobokhobo usekhiphe ingoma entsha ebizwa ngokuthi Isela leGwamba ekhuluma ngothando.
Ekhuluma lentatheli uMadlela ubike ukuba ingoma yakhe le igxile ethandweni njalo isitholakala enkundleni zokuxhumana.
“Ngikhiphe i-single track ehamba levidiyo. Ingoma le ikhuluma ngothando njalo ngiyethemba abalandeli bazayithakazelela.
“Ingoma le iphuma kuMadlela Stories lapho engikhuluma ngokuthi ngafika eMakokoba ngathandana lenye intombi yahle yathatha inhliziyo yami, yaba lisela lenhliziyo yami,” kutsho uMadlela.
Ubuye waveza ukuba ingoma yakhe iyatholakala kunkundla zokuxhumana.
“Ingoma le abalandeli bangayithola enkundleni zokuxhumana zonke ezibalisa iSpotify, YouTube kanye leFacebook. Abalandeli kukhanya bayayithakazelela lingoma ngoba ngithe ngicina ukukhangela ku-YouTube besesifike ku-10 000 ama- views, okuveza ukuba iyenza kuhle kakhulu.
“Ngithanda ukubonga abangisekelayo ngipheka lingoma labalandeli bomculo wami ngithi asambeni enkundleni zokuxhumana siyelalela ingoma yothando sibukele levidiyo yakhona.
“Ngokwenza lokhu siyabe siphakamisa okwakithi. Ongakezwa ngengoma kaMadlela entsha gijimela kumapheji ami enkundleni zokuxhumana uyezizwela ubunandi bodwa, ukutshelwa yikuncitshwa,” kuphetha uMadlela.
