Online Reporter
Ethel Ncube
UMHLABELELI weRhumba uClement Magwaza leqembu lakhe kunye leqembu leNsimbi ZeZhwane bethule amadlalade abo amatsha ePalace koBulawayo kuviki edluleyo.
Iqembu likaMagwaza lo Macrey Super Sounds kunye leNsimbi ZeZhwane angene esitikini kwaba ncane indawo ePalace.
UMagwaza wethule idlalade lakhe elithi; Indoda yi-Umbrella kukanti iNsimbi ZeZhwane zethule idlalade lalo eliphume mhlaka 1 Lwezi elithi; Imfundamakhwela.
UMagwaza obethabe emanzi te uveze ukujabula ngendlela abalandeli bakhe abamukele ngayo idlalade lakhe elitsha.
“Sethule ingoma yethu elinye ilunga lethu, uSotsha lisanda kwedlula emhlabeni. Idlalade leli lilengoma eziyisithupha ezikhuluma ngezimo ezitshiyeneyo ezibalisa Amacala, iKhisimusi, Ilifa lokunye okutshiyeneyo konke yizimo esihlangana lazo ekuphileni kwethu.
“Ingoma ezikudlalade lethu zibalisa ethi; Sayijeni, Amacala, Ilifa, Indoda yi-Umbrella, Ukukhanya lethi Ikhisimusi. Eyiyo ehamba phambili ngethi; Indoda yi-Umbrella,” kutsho uMagwaza.
Uqhubekele phambili eveza ukuba ingoma zabo sezikhona emoyeni.
“Sithanda ukubonga usekelo lwenu, lokuzosixhasa ngobunengi ePalace, latshengisa uthando lokusithakazelela ngokuza kwenu, siyabonga kakhulu, lizizwe libongekile lonke endaweni ezitshiyeneyo,” kutsho uMagwaza.
Idlalade leNsimbi zeZhwane lona lilengoma eziyisikhombisa ezithi Folosi, Umthobanhliziyo, Ingezamanxeba, Inkemba, Ulibofuzo, Umambule, kanye lehamba phambili ethi Imfundamakhwela.
