Online Reporter
Mbulelo Mpofu,Zimpapers Arts and Entertainment Hub
UMPHEKI wodumo kwezokudla kwesiNtu, uPrince Sivalo Mahlangu unxuswe edolobheni le-Addis Ababa, e-Ethiopia, kumhlangano we-Alliance for Food Sovereignty in Africa (AFSA).
UMahlangu waziwa ngohlelo lwakhe lukamabonakude kuYouTube olubizwa ngokuthi “Magriza Made Me Cook”.
Umhlangano lo, oqale ngoLwesithathu, ugqitshwa lamuhla, ngowabapheki abaphuma emazweni e-Africa, kuhloswe ukukhankasa ngokudla okulinywa lokudliwa ngabantu abaNsundu.
Uqoqwe ngaphansi kwendikimba ethi: “Ukudla kwami ngokwe-Africa”. Kuhloswe ukukhankasela ukudliwa kokudla komdabu we-Africa, njengensika yokuvuselela amasiko, impilakahle lokulondolozwa kwemvelo.
Bekuhlangene njalo inkokheli, ingcitshi lengatsha eziphatheka kwezokudla.
Kuvulwa umhlangano lo, uHana Abebe, onguChief of Staff and Special Advisor kumphathintambo wePlanning and Development kuhulumende kulelo, uthe kuqakatheke kakhulu ukuthi kulondolozwe ukudla okulinywa e-Africa nanko kuloguquka komkhathi okubangela ukungani kwezulu, lokugugudeka komhlabathi.
Ukhulume kabanzi ngokukhankasela ukulima ngokulandela isimo somkhathi, kuqakathekiswa abalimi abasakhula, abesifazane labasakhula.
“Inkinga lezi zisinikeza amathuba okuguqula inhlelo zokudla kwethu, kube lenhlalakahle lokulingana ebantwini,” kutsho uAdebe.
Umqondisi we-AFSA, uMillion Belay ukhulume ngokuqakatheka kokugcina imvelo.
