Online Reporter
YiNtatheli kaMthunywa
KULEMULI yakoNdlovu eNew Lobengula koBulawayo ezonde igane unwabu ngemva kokubikelwa ukuba indodakazi yayo isidlule emhlabeni kulandela ukuthelwa ngephethulo batshiswe ngumakhwapheni “wendoda abethandana layo” ndawonye lengane yabo belele.
UMelissa Lesley Ndlovu (23) lendoda le okubikwa ibingumakorokoza kunye lengane yabo elomnyaka kubikwa bathelwa ngephethulo linina elazakala ngokuthi nguFlorence nje kuphela, elalithandana lomkakhe andubana abalumathise bephila ngeviki ephelileyo.
Kubikwa uMelissa wedlula emhlabeni ngoLwesine kuviki ephelileyo, kukanti umkakhe ubhubhe ngoLwesibili ebusuku.
Unina omncane kaMelissa uveze ukuthi kwafika umngane wakhe embikela ngokutshiswa kwabo.
“Kwafika umngane kaMelissa engibikela ukuthi bathelwe ngephethulo batshiwa ngobethandana lejaha likaMelissa ngoLwesibili kuviki ephelileyo.
“Mhlalokho ngangingelamali, kuthe ngosuku olulandelayo sengilungela ukuyafika esibhedlela umngane kaMelissa wangitshayela ucingo esengibikela ukuthi usedlule emhlabeni,” kulandisa uninomncane kaMelissa.
UMthunywa uzwe ukuthi imuli yakoNdlovu ibingamazi umkhwenyana onguye “obulalise” indodakazi yabo.
Intatheli ixhumane njalo loGogo kaMelissa, uVirginia Phiri obike ukuba uzwa ubuhlungu ngokufa komzukulu wakhe.
“Satshayelwa ucingo ngomunye umngane kaMelissa ngoLwesine esibikela ukuba usedlule esibhedlela seUnited Bulawayo Hospitals (UBH).
“Sahamba sayabona lapho abatshiselwa khona kodwa akutshengisi ukuba kungabe kuyindawo eyatshela abantu. Akulamuntu osichazela kuhle ukuba kwahamba njani njalo lomabulala lowu ukuthi ungaphi, sizwa kuthiwa nguFlorence oweNtabazinduna.
“Emapholiseni eMatopo sahamba sayabika basitshela ukuba basebenza bebabili bayasilela, kungakho sathi sizalinda insuku ezimbili ukuba basebenze indaba yethu kodwa kuze kufike lamuhla akula pholisa eselibuyile. Sidinga ukuchazelwa kabanzi ukuba kuhambe njani ngodaba lolu lomatshisa sifisa abanjwe abotshwe,” kutsho uGogo uMaPhiri.
“Lokhu engikukhulumayo ngesikuzwayo, kakho ophumela egcekeni ngokwenzakalayo. Indoda ebithandana lomntanethu uMelissa kuthiwa yayilomunye ethandana laye, yasikhetha uMelissa, umakhwapheni wasebathela iphethulo wabatshisa phakathi kobusuku wabaleka,” kutsho umama kaMelissa.
“Ijaha likaMelissa lalo kuthiwa selidlule emhlabeni basithumele umlayezo abakibo kajaha besithi lokhu ebelikufisa sokugcwalisekile umntanabo usebhubhile.
“Oseleyo ngumntwana kodwa laye usesimeni esibi khona esibhedlela. Umntwana ngeke simthathe.”
Uqhubekele phambili wathi bakhangelele ukungcwaba ngoLwesihlanu.
“Sicela ukuncediswa ngokudla, amanzi, imota zokuthwala abantu emfeni kanye lemali yokubhadala emotsha. Abafisa ukusincedisa bangasithinta kunombolo lezi 0783208709 Virginia Phiri zikhona kuEcocash.”
Intatheli ixhumane lesikhulumi samapholisa elizweni uAssistant Commissioner Paul Nyathi uthe amapholisa asachwayisisa ngodaba lolu.
“Sizakhipha umbiko ogcweleyo ngokuya kwesikhathi, okwakhathesi silokhu sisachwayisisa,” kuphetha uCommissioner Nyathi.
