admin
Thokozile Mbedzi
ZILOKHU zinkemile izakhamizi zesigabeni seWilby’s eSigodini ngemva kokuba omunye umakorokoza edutshukelwe ngamahola esemgodini ngeviki ephelileyo wafa.
Umuyi uLeeroy Mazhinge oleminyaka engu-32 wehlelwe ngamashwa la mhlaka 27 esemgodini weCrocodile Mine.
Ekhuluma lentatheli kaMthunywa uMnumzana Japhet Moyo omunye wabahlali bakulindawo uthe uMazhinge wehlelwe yinto yamehlo.
“Lokhe ngididekile ngengozi eyehlele uLeeroy. Ubhubhe ngendlela ebuhlungu kakhulu kambe edutshukelwa ngamahola.
“Kambe ungathi amahola equphuna inkalakatha yelitshe phansi libe yizicucu umuntu ke limthini mpela.
“Sidanile silapha njalo ingozi le ngeke sayikhohlwa lula. Kukhanya ngesikhathi exhumanisa intambo phakathi emgodini usuke walibala ukuphangisa ukuphuma yikho okubangele ukuthi aze ehlelwe yingozi le esemgodini,” kulandisa uMnu Moyo.
Kubikwa indaba le ihle yabikelwa amapholisa.
Isikhulumi samapholisa esabelweni seMatabeleland South ulnspector Loveness Mangena ebuzwa ngodaba lolu uthe solufikile ewofisini yabo.
“Udaba lwendoda edutshukelwe ngamahola ngesikhathi iphansi emgodini solufikile ewofisini yethu, sithanda ukukhuthaza abaqhatshi ukuthi bangadingi abantu abangela lwazi oluqondileyo ikakhulu emsebenzini oyingozi njengalowu ukuze singalahlekelwa yimpilo mahlayana nje,” kuphetha ulnsp Mangena.
Online Reporter