admin
Ncekwenhle Ncube
KULOMAKOROKOZA omiswe phambi kwenkundla yeTredgold koBulawayo ngoLwesibili kuviki ephelileyo esetheswa icala lokugwaza omunye utsheketsha ngebhemba okubangele ukuthi asale ephethe amathumbu ngezandla.
Umsolwa uBongani Dube oleminyaka yokuzalwa engu-33 oweCriterion Government Mine umiswe emthethwandaba lo esetheswa icala lokuzama ukubulala umamangala, uProsper Sibindi oleminyaka yokuzalwa engu-30.
Inkundla ibikelwe ukuthi mhlaka 1 Mpandula ngehola letshumi phakathi kwamabili umsolwa wavakatshela umamangala.
Ngaleso sikhathi wafika wamthethisa ethi uyadelela kungakho ufuna ukumbulala.
Kukhanya njalo ngaleso sikhathi umsolwa wayedle amabele nanko phela wayethinta imbuzi.
Kuvele ukuthi umsolwa waqala ukutshaya umamangala waze walanyulelwa nguMnunzana Vincent Ncube ongunogada kule indawo.
Umtshutshisi kulelicala uMnunzana Nkathazo Dlodlo uqhubekele phambili esethulela inkundla ukuthi ngemva kokulanyulwa bakhumisana umlotha kodwa wabuya wamhlasela ngemva kokusuka kukaMnu Ncube.
Kubikwa umsolwa wakhupha ibhemba waqhaqha umamangala isisu ngayo.
UMnu Vincent kubikwa wabizwa ngumkhosi owahlatshwa ngumamangala wasebiza uWorship Dube onguye owamphathisa ukubopha umsolwa.
Kuzwakale ukuthi ngesikhathi umsola ebotshwa umamangala wayesethe daca phansi lamathumbu esekhanya egcekeni.
Umamangala wagijinyiselwa esibhedlela seUnited Bulawayo Hospitals.
Umantshi kuleli icala uNkosikazi Evelyn Mashavakure udlulisele phambili ukuthoniswa kwecala leli kumhlaka 18 kuyonale inyanga.
Lokhu kungenxa yokuthi umamangala ulokhe ephathekile emzimbeni.
Online Reporter