admin
Fairness Moyana
UMTHENGISI webhawa yeKamativi usele emanxebanxeba ngemva kokuhlaselwa ngesinye isakhamuzi ebesimethesa icala lokweba udondolo lwaso.
UGeshom Mhlanga (23) osuka eKamativi uzonde wadla amalahle ngemva kokuthi intonga yakhe ayisebenzisa ukuhamba ilahleke okwenze wahlasela uDube lapho abakade benatha khona.
Umsolwa ubikele umantshi kulelicala uNkosazana Rose Dube ukuthi isenzo sikamamangala esokumfihlela intonga yakhe simcunule kakhulu.
“Nkosi, ngazizwa ngifikelwa lulaka ngesikhathi sekufanele ngiye emzini wami kodwa intonga yami ngingayiboni.
Ngabuza umamangala ukuthi ingaphi wathi uyihluthulele phakathi ebhawa njalo ngizayithatha kusisa.
“Ngasuka ngazonda kakhulu ngoba wakhanya engelandaba lalokhu engangikukhuluma laye ngasengimtshaya.
Inkundla ingixolele ngalokho,” kuncenga umsolwa uMhlanga
Inkosi ikutshaye indiva lokho. Umsolwa utholakale elecala lokuthatha umthetho awufake ezandleni zakhe.
Ngakho ugwetshe ukusebenza gadalala okwenyanga ezilitshumi lambili kwathi ezine zephulwa.
Kuthe phakathi kweziyisificaminwe mibili kwephulwa ezine nxa engabhadala umamangala imali engange$198,00 kusiyafika umhlaka 31 Mpandula.
Umtshutshisi kulelicala uTinomupeyi Mbiza wethulele inkundla ukuthi mhlaka 25 Nkwenkwezi phakathi kwamabili ngehola letshumi lanye ebhawa yeBig Bar esidikidikini seKamanassie kwaba lokungazwisisani phakathi kukaMhlanga loNcube mayelana lentonga eyayicatshile.
Kubikwa uNcube wacebisa uMhlanga ukuthi kwasekusebusuku ukuthi avule ebhawa ngakho kwakufanele aphenduke kusasa ukuzathatha intonga yakhe.
Lokhu kwenza umsolwa wazonda ngoba engeke enelise ukubekezela ngakho watshaya umamangala wamqamula ingalo.
Ngemva kokunanzelela ukuthi wayesedale icala, umsolwa wabaleka.
Uze wavela ngesikhathi esedingwa ngamapholisa ngemva kokuthi uNcube esemangale icala lakhe.
Kusenjalo nje kulamadoda amathathu asuka esigabeni seSiphezini eSigodini ngaphansi kukasobhuku uMabaleka amiswe phambili komthethwandaba weTredgold koBulawayo esetheswa icala lokuhlasela omunye umathengisa amgwaza bezama ukutshontsha imali.
Umsolwa uEvans Moyo (32) lomngane wakhe uDalokuhle Sibanda (25) kubikwa mhlaka 22 Ntulikazi ngehola letshumi lanye bavakatshela esitolo seNevanda General Dealer esiseduze lomgwaqo weMzingwane eWorringham ngenhloso yokugqekeza.
Umtshutshisi kulelicala uMnumzana Nkathazo Dlodlo ubikele inkundla ukuthi mhlaka 22 Ntulikazi umsolwa uEvans Moyo loDalokuhle baya esitolo sakoNevanda General Dealer ngenhloso yokugqekeza.
Bafika bahlasela umthengisi ngokumgwaza njalo bazama ukumbamba iganyavu.
Kubikwa ngesikhathi befika kuleyondawo umamangala wazama ukuhlaba umkhosi ukuze unogada wakule indawo amsize.
Lokhu kwenza ukuthi izikliwi lezi zimlandele endlini zafika zamgwaza andubana zizame ukumbhinya.
Umantshi kulelicala uNkosazana Evelyn Mashavakure utshele inkundla ukuthi icala leli lizaqhubekela phambili mhlaka 17 Mpandula.
Online Reporter