admin
YiNtatheli kaMthunywa
UMQEQETSHI weChicken Inn uJoey Antipas uthe lonyaka amaqembu amanengi azayifunda ivaliwe kuligi yePSL ngoba sekusele kancane ukuthi babe zintshantshu.
Iqembu leli elazakala ngokuthi ngamaGamecocks kubalandeli balo, lidonse nzima kumasizini adluleyo.
Sekuyisikhathi ithimu le yanuka inkezo yeligi.
Sebengene batshintshana abaqeqetshi kulithimu kodwa kusehlula ukuthi bayithathe inkezo yeligi. Sokuleminyaka eyedlula emine iqembu leli lidonsa kanzima emidlalweni eminengi ngesikhathi kukhangelelwe ukuthi likhokhele.
Lonyaka likhangelelwe kakhulu ngabasekeli balo ukuthi libuyisele injabulo.
UAntipas wazise iphephendaba likazulu ukuba uselungise ithimu wayiphenduphendula ukuthi yesatshwe lonyaka.
“IChicken Inn yiyo ithimu yokubukela kumidlalo eseleyo kulisizini. Sengiyilungise yaphelela.
“Ngilesiqiniseko sokuthi lonyaka sizayithatha inkezo yePSL, labadlali bazimisele kakhulu. Ngilethemba abantu abanengi bakhangele ukuthi kulogu siseduzane lamathimu akhokhelayo. Lonyaka yithi inkunzi njalo lenkezo yePSL ngeyethu,” kutsho Antipas.
Kulisizini iChicken Inn ihle yazise ukuzimisela kwayo ngokutshaya iDynamos 3-0 kuhlandla lakuqala.
Iqembu lithenge abadlali abayisikhombisa ilungiselela iPSL, okwenza abasekeli basola lelinyathelo bethi ithimu idlalise imali. Kwabalesikhathi lapho abasekeli abafanayo abacela ukuthi uMangwiro atshiye umsebenzi.
Ngokuma kwengalane yeCastle, iChicken Inn iphendulela iligi iphethe imiklomelo engu-29.
Umgcinisihlalo weChicken Inn uLifa Ncube, uthe kumidlalo eseleyo kuzatsheka amabhulugwe ngeqembu lakhe.
“Utsho kahle umqeqetshi wethu. Siyamsekela nxa esithi uyayifuna inkezo yeligi. Yikho esikudlalelayo. IPSL yalonyaka izabe imnandi kakhulu ngoba sizabe sihlabela kokuphela size siyeyithatha inkezo yePSL,” kutsho uNcube.
Online Reporter