admin
Lungelo Ndhlovu
KULOMBALISI wakoBulawayo osele ephethe izibindi ngezandla ngemva kokuvuka ekuseni impahla zakhe zigcwele egumeni kanye lebhulugwe ayelele eligqokile kodwa indlu ihluthulelwe, uMthunywa ukuzwile lokhu.
Impicabadala le yenzakale kuviki edluleyo elokitshini leNew Luveve.
Umbalisi lo, uNkosazana Violet Matsuro ongaba leminyaka yokuzalwa engu-40 usele ekhuza umhlola ngemva kokuthola amabhuku abafundi, isikhwama sempahla zakhe, izimbiza, kanye lempahla kugcwele phandle yena elele ehluthulele endlini.
Okunye okwethusa umbalisi lo yikuthi ibhulugwe (skin tight) ayelele eligqokile lalo lavuka liphandle kodwa kazange azwe ekhululwa impahla lezi.
Akwaziwa ukuthi impahla lezi zakhutshwa ngubani endlini kodwa okwacatshayo yifoni, imali kanye lesitshebo esasisefilijini.
UMthunywa uphuthume wayafika endlini kaNkkz Matsuro ukuyazwisisa ngodaba lolu.
Umfakazi oqotho ohlala kuleyondlu njalo engunina omncinyane kaMatsuro, uNkosikazi Sehlule Mpofu ubikele iphephandaba likazulu ukuthi laye usehlezi ezidla amathambo engqondo ngenxa yesiga esabehlelayo.
“Okwenzakala kuMatsauro kwangithena amadolo ngoba sonke esihlala kuyonale indlu kasizange sizwe ngitsho umsindo njalo lomuntu owakhipha impahla phandle kasizange simbone ngitsho lomkhondo wakhe kasikawuzwa,” kutsho uNkkz Mpofu.
Uqhubekele phambili wathi lokhe wathwetshulwa yingwe kakaze akubone lokhu.
“Mina ngezwa sengibizwa nguMatsuro ekuseni ngabona impahla zigcwele phandle endlini kubetha ibhungazi,” kulandisa uNkkz Mpofu.
Omunye njalo umakhelwane oziveze ngokuthi nguMnumzana Sibanda nje kuphela uveze ukuthi kalankani ngesehlakalo lesi.
“Ngileqino lokuthi leli bekulisela elitshontsha ngomuthi. Ngake ngezwa indaba efana lale yenzakale elokitshini le Number 6.
“Esingakuqondisisiyo yikuthi pho-ke nxa isela leli belifuna ukutshontsha kungani liphinde latshiya impahla zonke phandle,” kutsho uMnu Sibanda.
UNkkz Mpofu wengezelele ngokuthi umbalisi lo uMatsuro waphupha kulomuntu owayezama ukungena endlini ngefasitela mhla kusenzakala isehlakalo lesi.
“UMatsuro uthi waphupha engani ulele lomunye umuntu kwasekusiba lesela elalifuna ukugqekeza,” kutsho uNkkz Mpofu.
Kuzwakale njalo ukuthi uMatsuro wavuka egcwele ubudoda emlenzeni.
UNkkz Mpofu ubikele iphephandaba likazulu ukuthi uNkkz Matsuro wahamba lodadewabo ekhaya lokuthi kasela foni ngoba yatshontshwa mhlalokho.
Online Reporter