. . . Yisikhathi sethu lesi: Nation Dube

YiNtatheli kaMthunywa
ISIZINI ingakayindawo,  uNation Dube umqeqetshi weHwange FC useziphosele amehlo, nanko  phela usebike ngokungesabi ukuthi inkezo yeCastle ngeyakhe.
Kungxoxo abelayo loMthunywa ngoLwesibili uDube uthe: “Yisikhathi sami lesi. Ithimu yami izaqinela wonke amathimu isizini ize iphele.”

Akulamuntu ongamsola uDube ngokuzikhukhumeza kwakhe ngoba ithimu le ilungiselele isizini ngokuzotha, njalo akula okwaziyo ukuthi iphetheni kulisizini. Kumalungiselelo ayo, ikhethe ukuphakamisa abadlali abakumathimu ama-juniors.

Kwandise ukuthi iChipangano ithenge abadlali abavela kwezinye indawo kodwa kubikwa lokho akuyincedi.
Isinqumo esikhona esivela kubasekeli lenkokheli zethimu yikuthi iChipangano idlalelwe ngabafana abaphuma eHwange kuphela.

“Ithimu iqine kakhulu ngoba sengiyilungiselele yaphelela. Indlela iHwange ezaphenduka ibukhali ngayo, izaphaphamisa amaqembu akade eyidelela,” kutsho uDube.

Kodwa, ngokuhlolisisa umdlalo walithimu kumasizini ambalwa adluleyo, kutholakale ukuthi iHwange ibiqalisa kuhle, yehluleke isizini isiyaphutsha.

Inkinga zeHwange zijwayele ukuhlasela kusigaba sesibili sesizini. Imbali iveza ukuthi iqembu lilahlekelwa yimiklomelo ngalesisikhathi loba iqalise itshisa.

Ebuzwa ngalokhu uDube uthe kulisizini kuzakuba lomahluko.
“Ungakhumbula ukuthi ngomnyaka ophelileyo saqalisa kakuhle sacina sesiphansi. Kwakulenkinga eqenjini, kunengi okwakuhlupha. Khathesi asicabangeli ukuthi kungaba lenkinga enjalo.

“Abadlali bayazi ukuthi ukuwa kwethimu yikuwa kwamabizo abo.”
IHwange yilo lodwa iqembu elingazange lizihluphe ngokuthenga abadlali. Ngokuzwa kukaMthunywa, isizatho yikuthi inkokheli zethimu sezifuna ukuthi kudlale abafana abadabuka esigabeni seHwange kuphela. Okunye yikuthi iqembu aliselamali njalo abadlali babhadalwa ngemva kwesikhathi eside.

Abafakazi abaqotho kuleliqembu bathe inkokheli zaqonqosela uDube ukuthi enze okusemandleni akhe ukuthi anqobe ngoba engaswela umsebenzi.

“Inkokheli zethu azifuni kunqotshwa lula kulisizini. UNation (Dube) watshelwa ngalokhu,” kutsho esinye isikhulu seHwange.

Umqeqetshi uDube ucele usekelo lwabalandeli babo wathi sekumele balandele ithimu kumidlalo yabo yonke.

Ngiyabona ithimu ukuthi isisukuma.  Njengoba sesiqala imidlalo, ngilethemba lokuba imiklomelo sizayithola kumidlalo yonke. ”