admin
Msilisi Dube/Samkelo Tshuma
ZILOKHE zingayivali imilomo izakhamizi zeHope Fountain bucwadlana ledolobho lakoBulawayo kulandela ukuzwa ngomntwana oleminyaka emibili okucatshangelwa ukuthi uselenyanga ezimbili engena esikhathini.
Umntwana lo kuzwakale ukuba uqalise ukungena esikhathini ngenyanga kaZibandlela kuwonalo umnyaka.
Umfakazi oseduze lemuli le ongathandanga ukuveza igama lakhe ubikele iphephandaba likazulu ukuba umntwana lo uyangena esikhathini lanxa unina ekufihla.
“Indaba yokungena komntwana lo esikhathini yamangalisa isigaba sonke. Ekuqaleni sasicabanga ukuba mhlawumbe umntwana lo udlwenguliwe kodwa savakatshela umntwana lo samhlola sabona ukuba kazange ahlukuluzwe.
“Angikaze ngikuzwe ukuthi umntwana uyangena esikhathini. Yikho nje ngiqala ukukuzwa ngangingakukholwa kodwa ngakholwa sengibuzisise kunina womntwana lo,” kuchaza umfakazi lo.
Umfakazi lo uqhubekele phambili wathi indaba yokungena komntwana lo esikhathini iphethwe njengeqanda emulini le.
“Imuli le kayifuni kwazakale ukuthi umntwana lo uyangena esikhathini ngoba kungani kuyabayangisa. Kungabe kulomuntu owagangela imuli le,” kuchaza umfakazi lo.
Omunye njalo umfakazi uMnumzana Luckmore Ncube uveze ukuba umntwana lo selokhe wagulayo kakaze asiwe esibhedlela. “Umama lo kakaze azihluphe ngokusa umntanakhe esibhedlela lokhe lokhu kwamqalisayo.
Wayebonakala kuphela ebhodabhoda emzini wakhe. Okusidanisayo yikuthi kazange atshele muntu ukuthi ugulelwa ngumntwana,” kuchaza uMnu Ncube.
UMthunywa uxhumane lonina womntwana lo, uMaMpofu waveza ukuba kuliqiniso ukuba umntanakhe wake wagula kodwa kazange athande ukuchaza kabanzi ngesifo somntanakhe.
“Umntanami wake wagula kodwa kazange athathe isikhathi eside. Mina kuyangimangalisa ukuba ukugula komntwana lo kumangalisa ngani. Umntanami wagula njengabo bonke abantwana abancane,” kuphetha uNkszn Mpofu.
UMthunywa ubuzisise ngalokhu kuDokotela Chareffa Sururu uthe kumele umntwana lo asiwe kugcitshi ukuze kubonakale ukuthi yikungena esikhathini kumbe ulesifo esitshengisa ukuthi ulimalele ngaphakathi.
Online Reporter