Online Reporter
YiNtatheli kaMthunywa
KULOBHISHOPU oleminyaka engu-38 webandla le Emmanuel Apostolic Church koBulawayo omiswe emthethwandaba esetheswa icala lokudlwengula ilunga lebandla lakhe elileminyaka engu-18 yokuzalwa.
Umbhishopu lo, uJoseph Munetsi ohlala elokitshini leNjube kazange abuzwe ukuba uyalivuma kumbe hatshi icala lakhe, kodwa uvalelwe ejele kukhangelelwe ukuba aphenduke emthethwandaba mhlaka 3 Mfumfu.
Umtshutshisi kulelicala uNkosazana Hazel Ncube uthe ngosuku olwaziwa yinkundla, phakathi kwenyanga kaNcwabakazi loMpandula nyakenye, uMunetsi wafica umamangala eyedwa ngakibo, wafika wambamba ngendlela engaqondanga isitho sakhe sangasese.
Ibizo likamamangala ligodliwe ngenhloso yokumvikela. Inkundla izwe njalo ukuthi uMunetsi waqhubeka esethusela umamangala ngokuthi uzahlaselwa yimimoya yamadimoni angavele abikele loba ngubani indaba le.
“Umsolwa wafica umamangala eyedwa ngakibo wambuza ukuba ulenhlupho na ezidinga ukuba amsize kuzo. Wasesukuma, waphakamisa umamangala wamqabula ngapha embamba isitho sangasese,” kutsho uNkszn Ncube.
Uthe ngemva kokwenza lokhu walaya umamangala ukuba abuye lamanzi lesawudo wawathandazela wasesithi anathe lawomanzi ahlanganiswe lesawudo. Umamangala kazange achaze ngesehlakalo lesi.
UNkszn Ncube uthe ngenyanga kaNcwabakazi uMunetsi wafica umamangala eyedwa wambamba isandla andubana amdonsele kwelinye ikamelo wamdlwengula ngapha emhwabhela.
Ngemva kokudala icala leli wabuye wethusela umamangala.
Ithumba leli libhoboke mhlaka 11 Mpandula umamangala esebikela umzawakhe owayembuza ukuba kungani ehlala engathi udidekile emqondweni.
Indaba le yabikwa enkambeni yamapholisa eBulawayo Central Police Station, umamangala wahanjsiwa esibhedlela ukuze ayehlolwa.
