Online Reporter
Langalakhe Mabena
UMLINGISI kamabonakude odabuka koBulawayo uMbo Mahocs, uqhubeka ephakamisa ibizo lakhe eSouth Africa ngemva kokuthola indima emdlalweni omutsha othi The Last Stitch, oyingxenye ephuma kumdlalo odumileyo ku -eTV, iHouse of Zwide.
UMbo Mahocs, uzalingisa indawo kaDolly, umlingiswa okubikwa uzadlala indima enkulu ekuhlanganiseni izigigaba ezibalulekileyo njengoba iHouse of Zwide isondela emaphethweni.
UMbo Mahocs waqala ukuzakhela udumo njengomethuli wenhlelo zikamabonakude ngaphambi kokungena kwezokulingisa.
Ngemva kwalokhu, waba yintandokazi yabalandeli emdlalweni we-Scandal lapho ayelingisa khona eyisizalwane seNigeria, uChi-Chi.
Wathola ukunconywa okunengi ngenxa yendlela ayekhuluma ngayo ulimi lwaseNigeria ngendlela eyayikholakala kunengi lababukeli.
IHouse of Zwide, umdlalo odume kakhulu okhuluma ngomhlaba wezomswenko uzadlalwa okokucina mhlaka 26 Nhlangula 2026, uphethe uhambo lwawo olube yimpumelelo ngemva kwamasizini amahlanu.
Amaprojusa omdlalo, iBomb Productions kunye le-eTV, bakhethe ukuwuqeda usasemazingeni aphezulu wobuciko.
Isiphetho salumdlalo sizaxazulula umbango osulesikhathi eside phakathi komdeni wakwaZwide lezitha zawo.
Kulezo zigigaba zokucina, kuzaba lezehlakalo lapho okuzaphetha ngokufa kukaMsizi, olingiswa nguMduduzi Mabaso.
Ngakwelinye icele, uFaith, olingiswa nguWinnie Ntshaba, uzethweswa umlandu ngalesisehlakalo, acine esaliwa ngu-Ona, olingiswa nguNefisa Mkhabela.
Njengoba ikhetheni lisehla kulumdlalo, u-Ona uzaphiwa ithuba lomsebenzi eParis, eFrance, alungiselele ukutshiya iSouth Africa.
Lokhu kuzatshengisa ukuqala impilo entsha kuye njalo kuvulele labanye abalingiswa amathuba okuqala impilo entsha.
