Online Reporter
USETHOLE amadlelo aluhlaza phetsheya kolwandle umdlali wasemuva owe-Orlando Pirates, uMbekezeli Mbokazi.
Umdlali lo (20) usayiniswe liqembu leMelika elidlala kuligi yakulelo ephezulu eyeMajor League Soccer (MLS), iChicago Fire.
IPirates leChicago Fire zikuqinisekisile lokhu kuliviki lokuthi uMbokazi usayine inkontileka elizaphela ngo-2029, elombandela wokuthi iFire ingayenyusa ngomunye umnyaka. Isamba semali athengwe ngaso uMbokazi asizange sivezwe.
IChicago Fire iqede isendaweni yesitshiya galombili kulogu yeWestern Conference ngesizini ka-2025 esanda kuphela, yakhitshwa yiPhiladelphia Union kumidlalo yokuqala yamaMLS Playoffs.
Umqeqetshi weChicago Fire uGregg Berhalter, uthe bajabulile ngokuthola omunye wabadlali basemuva abasebancane.
“Loba esasemncane, utshengise ukuqina ukhakhayi lokuba ngumkhokheli kumidlalo yamazwe. Silindele ukuthi aphangise afike, enze umehluko eqenjini lethu lokuthi aqhubeke ngokuthuthuka,” kutsho uBerhalter.
UMbokazi ukhutshulelwe eqenjini elikhulu lePirates ngoMbimbitho lonyaka njalo kazange esakhangela emuva. Usedlale imidlalo engu-38 kweZimnyama emiqhudelwaneni ehlukeneyo, okubalwa kuyo iBetway Premiership, Nedbank Cup, Carling Knockout leCaf champions League.
Ngomnyaka odluleyo ubeseqenjini lesizwe lama-Under-20, Amajita, elinqobe iCosafa Cup. Udlale okokuqala eqenjini lesizwe elikhulu, iBafana Bafana, ngoNkwenkwezi lonyaka.
Ufike kwezwakala njengoba ekubadlali abamenyezelwe ngumqeqetshi, uHugo Broos, abazadlala ku-Africa Cup of Nations ezabanjelwa eMorocco kusukela mhlaka 21Mpalakazi.
Kubhekwe ukuthi adlale okokucina kwezikaMagebhula nxa sezidudulana leMarumo Gallants kufinal yeCarling Knockout ngoMgqibelo ntambama.- Ubulembu
