Online Reporter
AMAGAMA la athi “ukufunda akupheli,” akhulunywa phose nsuku zonke nxa abantu bexoxa ngezinto ezitshiyeneyo kukanti kwesinye isikhathi bayabe bebonisana ukuthi impilo injani njalo becebisana ukuthi akula okwazi konke, kukhona okusamele ukufunde.
Amazwi la, asetshenziswa ngendlela ezitshiyeneyo, uyezwa omunye esithi ukufunda akupheli, ucabange ngesikolo ukuthi kuyafundwa umuntu aze abenganani.Kukanti umuntu akakhulumi ngesikolo, ukhuluma ngezehlakalo eziwela abantu empilweni ukuthi umuntu kumele afunde ukuthi impilo injani ngezehlakalo azibona kwabanye.
Akukhathalekile ukuthi izenzo lezi ngezinhle kumbe ngezimbi.
Abadala babethi inyoni zibanjwa zisemaphuphu kukanti amathole lawo akhethwa kusakhanya. Isikolo sempilo sitsho ukuba kakho okwazi konke kodwa ufunda nsukuzonke nxa uphila uze uyengena egodini.
Kumele uhlale uqaphele, ukhangele abaseceleni kwakho ukuthi benzani ngoba kuyakufundisa ukuthi ezinye izinto ziphathwa njani.
Akunkwali yaphandela enye, abadala bawatsho la amazwi sebebonile ukuthi kuyingozi ukuthuma omunye umuntu ukuba akwenzele olunye ulutho olwaziyo ukuthi laye uyalufuna ngoba hlezi akuphambanise.
Kambe kuyadingeka ukuba uthi ungumuntu ube ngugeza sidle sonke isikhathi kumbe kudingeka ukuba ngitsho lasemakhaya ethu kuncediswane. Omunye avuke aphalale esiya le omunye laye esiyaphanda le kube sekuhlanganiswa khonalokho okutholakeleyo kugcinwe imuli.
Kukanengi sisizwa ngokuthi imuli kazibani banyana isidubeka ngoba ubaba onguye obebaselela kasekho emhlabeni.
Udideke engqondweni nxa ubona omunye umuntu elokhu ehlezi egoqe izandla ebukele amanye amanina egijima esiya le lale yena ethembe ukugcinwa ngumkakhe. Kambe kungenzeka ukuba umkakhe afe uzaselelwa ngubani, ngoba abadala endulo batsho ukuthi asikho esiphandela esinye.
Kuyadingeka nje ukuba umuntu afunde kusikolo sempilo ngokubona ngoba okunye akudingeki ukuthi uze utshelwe. Isikolo sempilo yikufunda ngokubona komunye ngoba kwesinye isikhathi akekho ozakutshela ukuthi lokho okwenzayo kubi kumele lawe uzibonele ukuthi laphana kubi utshintshe ukwenza.
Impilo yendulo ayisafani leyalamuhla ngoba sokulenguquko njalo labo ababeyimthombo yolwazi lwamasiko ethu abasekho kulo umhlaba, bahamba befumbethe ulwazi lwabo lonke, badliwa ngamagenga lalo.
Endulo, abadala babethi bengabona umuntu esenza okubi bambize bamhlalise phansi alaywe, pho-ke khathesi sokwatshabalala konke lokhu.
Ungabona usenza ulutho abantu bengakuthabeli ungagijimeli ukuthi abantu balomhawu.
Kuhle ukuthi ukhangele ukuthi ungabe uphambanise ngaphi uzame ukuguquka ubone kumbe lokhe uphathwa ngokufanayo. Yiso ke isikolo sempilo lesi.
Kungumbono waleliphephandaba ukuthi nxa ekhona okade elahleka ngokufunda impilo abanye besiya eNyakatho yena eqonda ngaseNingizimu. Okuncweba indlebe ngokuthandayo ngakho-ke umlandu susele kuwe ukuthi ufunde esikolo sempilo.
