Online Reporter
INYANGA zilomsebenzi omkhulu njalo zibalulekile empilweni yabanye abantu abansundu ngoba kukholelwa ukuthi zilomsebenzi omkhulu wokusiza abantu ukuze isizwe sakheke.
Ekadeni beziyizo odokotela, ziyizo njalo ezipha amacebo, zilungisa konke okonakeleyo ngobuqotho, ngesineke langenhlonipho enkulu.
Bezihlonitshwa ngendlela emangalisayo njengabafundisi kulezinsuku kodwa kulezinsuku seziguquke zaba yizitha zikaZulu abathakathi bezigodo!
Maviki onke sibala kumaphephandaba ngenyanga ezenza isihluku ngokuphathisa abantu ukuthi bone ngendlela ezitshiyeneyo. Zinengi inyanga eziziqhenya ngokuthi ziyenelisa ukwenza yiloba yini efunwa ngumuntu kungakhathalekile ukuthi yisono esinganani.
Isimanga yikuthi inyanga ezenza njalo ziyaphika zimbe phansi ukuthi zingabathakathi. Kanti pho nxa uzaphathisa umuntu ukuthi abulale umntanakhe ngoba usithi uzanotha ayisibo buthakathi pho. Nxa uzabikela umuntu ukuthi adlwengule indodakazi yakhe ukuze ingculazi iphume emzimbeni khonapha usithi hu, ayisibo buthakathi na.
Inyanga ezinengi nxa zisenza ukuganga kwazo zigijimela ukuvika ngokuthi zisiza umphakathi.
Umbuzo okhona yikuthi ukubulala abantu kumsiza njani umphakathi?
Nxa inyanga lezi ziqinisile ukuthi zisiza umphakathi kungani zingacabangi ubuhlungu obuzwiwa ngamalunga emuli zalabo ababakhweza mihla yonke?
Nxa besakha ngempela kungani bengakhuthazi labo ababacela ukuthi babakhwezele abantu ukuthi bazame ezinye indlela zokulungisisana ezifana lokukhulumisana kulokubulalana?
Imitshado eminengi ichithekile ngenxa yalezinyanga zamanga ezinika abantu imithi yokudlisa omkabo kanye lezifaka abantu ulunyoka.
Inengi lenyanga zakhathesi zizigijimisela imali nanko phela ukwelapha kwazo kuhamba ku-adivethayizwa njengebhizimusi. Imali isihamba phambili kuthi ukusiza uzulu kuze ngemuva.
Ngenxa yokubhaha kwenyanya ezigangileyo lezi, lezamanga kusuka kudide ingqondo ukuthi inyanga ziyingxenye yokwakhiwa kwemideni kanye lesizwe loba hatshi. Zona inyanga zoqobo zisesekhona kumbe sekungabathakathi bodwa?
Kanti zona inhlanganiso ezikhangela ngokusebenza kwazo inyanga lezi zithini ngokuziphatha kwamalunga ayo la achaya ukuganga kwawo egcekeni. Nyathelo bani elithathwayo ukuze ihlanze igama lenhlanganiso yayo eselisemanyaleni ngenxa yalezizigilamkhuba?
Kungumbono woMthunywa ukuthi nga inhlanganiso le ibeka imithetho lezinqumo ezithile ngokusebenza lokuziphatha kwamalunga ayo.
Kuqakathekile njalo ukuthi ibuye ilandelele wonke amalunga ayo ukuze ibone ukuthi izinqumo lezo ziyalandelwa. Bonke abazatholakala besenza okuphambene lezinqumo zenhlanganiso bakhutshwe emabhukwini abo ngoba yizigangi ezibulala isizwe.
