Online Reporter
INYANGA zilomsebenzi omkhulu njalo zibalulekile emplilweni yabanye abantu abansundu ngoba kukholelwa ukuthi zilomsebenzi wokusiza abantu ukuze isizwe sakheke.
Ekadeni beziyibo odokotela, ziyizo njalo ezipha amacebo, zilungisa konke okonakeleyo ngobuqotho langesineke.
Bezihlonitshwa ngendlela emangalisayo njengabafundisi. Kulezinsuku kodwa kungathi seziguquke zaba yizitha zikaZulu abathakathi bezigodo!
Kukanengi sibala kumaphephandaba ngenyanga ezenza isihluku ngokuphathisa abantu ukuthi bone ngendlela ezitshiyeneyo. Zikhona inyanga eziziqhenya ngokuthi ziyenelisa ukwenza yiloba yini efunwa ngumuntu kungakhathalekile ukuthi yisono esinganani.
Isimanga yikuthi inyanga ezenza njalo ziphika zembe phansi ukuthi zingabathakathi kanti pho nxa uphathisa umuntu ukuthi abulale umntanakhe loba isihlobo ngoba kuyiyo indlela othi uzaceba ngayo kayisi buthakathi na lobo?
Nxa uzalaya umuntu ukuthi adlwengule indodakazi yakhe kumbe umntwana omncinyane ukuze asile emkhuhlaneni othile, ayisibo buthakathi na?
Inyanga ezinengi nxa zisenza ukuganga kwazo zigijimela ukuvika ngokuthi zisiza umphakathi.
Umbuzo yikuthi ukubulala abantu kumbe ukuhlukumeza abanye basale bekhala impilo zabo zonke kumsiza njani umphakathi?
Nxa inyanga lezi ziqinisile ukuthi zisiza umphakathi kungani zingacabangi ubuhlungu obuzwiwa ngamalunga emuli zalabo ababakhweza mihla yonke?
Nxa besakha ngeqiniso kungani bengakhuthazi labo ababacela ukuthi babakhwezele abantu ukuthi bazame ezinye indlela zokulungisisana ezifana lokukhulumisana kulokubulalana?
Imitshado eminengi ichithekile ngenxa yalezinyanga zamanga ezinika abantu imithi yokudlisa omkabo kanye lezifaka abantu ulunyoka.
Inengi lenyanga zakhathesi zizigijimisela imali nanko phela ukwelapha kwazo kuhamba ku-adivethayizwa njengebhizimusi. Zinengi izihlahla ezifakwa amaphetshana lamazenge okuthi kulenyanga engabhodwayo endaweni ethile. Imali isihamba phambili kuthi ukusiza uzulu kuze ngemuva.
Ngenxa yokubhaha kwenyanga ezigangileyo lezi, lezamanga kusuka kudide umqondo ukuthi inyanga ziyingxenye yokwakhiwa kwemideni kanye lesizwe loba hatshi. Zona inyanga zoqobo zisesekhona kumbe sekungabathakathi bodwa?
Yona iZinatha, ekhangela ngokusebenza kwezinyanga ithini ngokuziphatha kwamalunga ayo la achaya ukuganga kwawo egcekeni. Nyathelo bani elithathayo ukuze ihlanze igama layo eselisemanyaleni ngenxa yalezizigilamkhuba?
Kungumbono woMthunywa ukuthi nga inhlanganiso le ibeka imithetho lezinqumo ezithile ngokusebenza lokuziphatha kwamalunga ayo. Kuqakathekile njalo ukuthi ibuye ilandelele wonke amalunga ayo ukuze ibone ukuthi izinqumo lezo ziyalandelwa. Bonke abazatholakala besenza okuphambene lezinqumo zenhlanganiso badatshulelwe izithupha ngoba yizigangi ezibulala isizwe.
