Online Reporter
YiNtatheli kaMthunywa
KULENINA elileminyaka engu-54 yokuzalwa okubikwa ukuthi lahamba kwelinye ibandla lamaPositoli enhlane eMbizo, eKwekwe ngenhloso yokuyakhulekelwa, lacina lilahlekelwa yimpilo yalo kulandela ukunathiswa umthandazo ohlanganiswe izinto ezehlukeneyo.
Isehlakalo lesi senzakale mhlaka 18 Nhlangula lapho uMicky Tshuma weMbizo, eKwekwe avakatshela enhlane ngehola lesikhombisa ebusuku.
Isikhulumi samapholisa eNkabazwe uInspector Emmanuel Mahoko uthe umthandazo lo wawuhlanganiswe amasese kunye legwayi lamakhala (umdombo) okwakubikwa ukuthi kuzasusa umnyama kunina leli.
“Inina leli selinathiswe lokhu labanjwa ngumoya kwathi amalunga ebandla leli aqala ukumthela amanzi aqandayo waba manzi te. Basebemthwala bamusa phansi komlilo ukuze akhudumale kodwa ngokusweleka kwenhlanhla wedlula emhlabeni,” kutsho isikhulumi samapholisa uInsp Mahoko.
U-Insp Mahoko uthe babophe umphurofethikazi uCharity Mafirowanda (46) kunye lamalunga angu-8 ebandla lelo abathi uTalent Khumalo (42), Bongani Paraffin (33), Admire Makota (23), Ronald Mandiedza (24), Margret Zireba (21), Lyton Ndlovu (19), Arnold Mashiri (23), lo Pauline Banda (33). Bonke laba betheswa icala lokubulala.
Uthe ngenhloso yokufihla iqiniso, iqembu leli lathatha isidumbu senina leli basisa endlini yakhe bafika basifaka embhedeni basembathisa.
“Isidumbu sananzelelwa nguTafadzwa Chemedza Matikiti (42) owayesenza imisebenzi yakhe yangekhaya owasuka wayabikela amapholisa.”
Kubikwa iqembu leli livalelwe ejele njalo amapholisa ayaqhubeka ngokuchwayisisa ngalo kulindelwe ukuthi baye emthethwandaba.
Amapholisa axwayise uzulu, abaphurofethi kunye lezinyanga ukuthi batshiye umkhuba wokunika abantu imithi lokunye abakulungisa bodwa okungahlolwanga zingcitshi ukuthi kuphephile yini.
