Online Reporter
Imbiko yabantwana abendiswa bebancane iqhubeka ikhuphuka kunye lokudlwengulwa kwabesifazana.
Okudanisayo yikuthi inengi lalabo abendisa abantwana ngabantu abayabe bekhangelelwe ukuthi babavikele kulokhu.
Kungakho-ke kusuka kudanise ukuthi lokhu kungabe kubangelwa yini?
Kambe lokhu kubangelwa yindlala esikhona kulezinsuku ebangelwa yikuguquka komkhathi kumbe njalo kubangelwa yimimoya esikhona kulezinsuku yokungaziphathi, ukungafuni ukuzisebenzela kumbe njalo yikuba labo abenza lokhu kababotshiswa, okwenza abangakenzi amacala afanayo babone sengathi yindlela yokuba baziphilise njengemuli.
Inengi labantwana abendiswa bebancane bacina besiba lomthwalo wokunakekela abantwababo bona bevele besesengabantwana njalo besadinga ukuba banakekelwe ngabazali babo.
Abanye njalo batshiya isikolo endleleni sebesiyakwendiswa ngoba besekhona abazali abanakana ukuthi ukufundisa umntwana oyinkazana yikudlalisa imali.
Amacala okwendiswa kwabantwana avame emaphandleni ehlukeneyo, okuveza ukwehluleka kwabanye abantu abangabazali ukuselela izimuli zabo baze bendise abantwana befuna imali yamalobolo.
Indaba lezi zidida ingqondo ngoba inengi labantwana laba bendiswa ebantwini abadala khatshana kulabo futhi labo bantwana bacina bengelamandla emtshadweni leyo bahlukuluzwe futhi babe sengozini yokutheleleka ngemikhuhlane yemacansini.
Kungumbono waleliphephandaba ukuthi amapholisa kumele afinyelele kuzo zonke indawo, emadolobheni kunye lemaphandleni, afundise ikakhulu abantwana ngokuhlukuluzwa lokhu okucina kubangela ukuthi bendiswe bebancane.
Umphakathi lawo kumele wazi ukuba kulicala ukwendisa abantwana. Lokhu kuzaphathisa njalo ukuthi abantwana laba bangabonakali njengendlela yokuba imuli nxa isisenkingeni ingendisa umntwana iyaphuma kulolodubo.
Kuhle ukuba abantwana kunye labomakhelwane bathi bengabona lokhu kusenziwa bayebikela amapholisa ukuze umntwana angacini enikwa umthwalo angeke enelise ukuwumela.
Nxa abantwana bangaba lolwazi kubalula ukuthi bangendiswa bakhulume masinyane izigangi lezo zibotshwe ngoba laba bantu bafana lababulali ngoba bebulala ikusasa lamantombazana.
Siyananzelela ukuba asikho isigwebo, imali loba ukuxolisa okungenza lo ohlukuluziweyo ngokwendiswa akhohlwe ngesenzo lesi kungakho kuba linxeba elihlala lichinca igazi ngaso sonke isikhathi.
Kungakho-ke kungumbono waleliphephandaba ukuba labo abatholakala belamacala okuhlukuluza abantwana ngokubendisa baphiwe izigwebo ezinde ejele ukuze labo bangaqhubekeli phambili ngempilo zabo njengalokhu abakwenza ababendisayo.
