Online Reporter
Nkosilathi Sibanda
IMIDLALO yobungane kubhola likanobhutshuzwayo kumele incedise ekuthuthukiseni ukubambana emphakathini, ukuphakamisa impilo zabadlali lokuqinisa ubudlelwano emulini, kutsho umgcinisihlalo weBulawayo Corporates Social Soccer League uTimothy Mandizadza.
Ubike njalo ukuthi inhlanganiso yabo ifuna ukuthi kusukela lonyaka, basebenzise ibhola lenyawo njengenkundla lapho amankampani azasondelela lomphakathi, kubelokuzwisisana okuzahuga inengi ukuthi libukele imidlalo le.
Imidlalo yeBulawayo Corporates Social Soccer League ilamaqembu abunjwe ngamalunga omphakathi kunye lamankampani athile koNtuthu.
UMandizadza, okhethwe ukuba ngumgcinisihlalo kumalanga adluleyo, utshele iphephandaba likazulu ukuthi bahlose ukuba lemidlalo eminengi lonyaka.
“NjengeBulawayo Corporates Social Soccer League sifuna ukusondeza abantu duzane lemidlalo yethu. Ibhola kumele lisibambanise. Kumele imuli zethu zenelise ukuzobukela, zijabule labadlali ngoba inengi lingobaba abakhokhela imizi lamankampani,” kutsho uMandizadza, oseke wabangu mkhokheli weBulawayo Christian League.
Esikhundleni sakhe sokuba ngumgcinisihlalo weBulawayo Corporates Social Social League uMandizadza uzancediswa nguBlessing Masimbe, kuthi uKing Zulu abengunobhala jikelele.
Okhethwe kusikhundla sikamhleli wemidlalo ngu-Odecious Mareveverwa, kusihlalo sikamgcinisikhwama ngu-Onias Musoni.
“Iligi le ihlose ukunikeza izisebenzi zamankampani ithuba lokuthi ziqinise imizimba yazo, zizinakelele. Impilakahle ibaluleke kakhulu emphakathini.
“Sifuna njalo ukuthi ngemva kwemidlalo yethu, abadlali basuke lapho bayegcina imuli zabo, babelesandla ekukhuliseni ilizwe. Ngokwenza njalo, ngeke sakhalaza ngokuthi abantu, ikakhulu intsha isebenzisa izidakamizwa lotshwala. Ibhola lenyawo koBulawayo Corporates Social Soccer League lizakuqeda konke lokhu.”
Ngesizini edluleyo, iligi le yayilamaqembu alitshumi lasithupha. Kulisini kuzangena amaqembu amabili, iGrills leLonestar.
Amaqembu ayedlala ngo2025 agoqela iSpeed Shipping, Simbisa, Warehouse Distribution, Evergold, Overnight, ZRP Donnington, Ostrich, ZETDC (W), McDonald, Bricks, Proton, Zimtile, Nust, Coca-Cola, Value Gas, Millenium leChibuku.
Imidlalo le idlalelwa enkundleni ezibalisela iRaylton, Nust, Emakhandeni Ground, Fairbridge laseGifford High School.
