Online Reporter
Ukudlova bekusaziwa kulicala elandise ukudalwa ngabantu besilisa. Lumbono sudlulelwe yisikhathi njengoba omama abayibo abandise ukuvikelwa emikhubeni yenswelaboya lezi sebevuke upenyane, sebeyibo abathumba amadoda bawadlove.
Kuleliviki, kuphephandaba lethu, kulodaba lwenina elileminyaka engu-20 leKwekwe elihlukuluze umfana oleminyaka engu-12. Inina leli kubikwa labukela imifanekiso elihlazo qede lehluleka ukuthiba imizwa yalo labamba umfanyana lo obengelamandla.
Isenzo lesi sitshengisa ukutshabalala kwamasiko kanye lenhlonipho osekusemhlabeni ngenxa yokwehluleka ukulawula imizwa nje qha.
Kuyaziwa ukuba owesifazana ulamandla okulawula inkanuko zakhe, pho laba abasuka bavume ukulawulwa yimizwa kuyabe kusuke kwathini emkhumbuleni yabo.
Okudanisayo yikuthi indaba zabesifazana abadlova abantwana sezisegudwini kulezinsuku.
Lanxa kuthiwa yikho ukulingana kwamathuba, kusobala ukuthi uHulumende uyabe ekhuluma ngamathuba entuthuko lenguquko okwakha isizwe hatshi ubukliwi obufana lalobu.
Lokhu akwehlukananga lakancani lobuthakathi njalo kumgceke ukuthi uNkulunkulu kathokozi ngakho.
Loba kuthiwa yimali, layo ayibusisekanga.
Lokhu kutshayisa ngovalo ngoba nxa omama abayibo abalesihelo sebezaphenduka inyamazana, umhlaba uyabe usuyini?
Kambe nxa omama okuyibo esikhangelele ukuthi bavikele abantwana ekuhlukuluzweni sekuyibo ababaphendukelayo babaphambanisele ikusasa labo, kubizwa kuthiwa yini lokho?
Lomuntu sebengambulala kungabi zindaba zalutho.
Kuyadingeka ukuba abantwana bafunde ukuba nxa bangavele bahlukuluzwe bangaze bakufihla lokho kodwa bakhululeke, babikele abazali babo loba abadala ukuze izigilamkhuba lezo zijeziswe zingakaze ziphambanise impilo yabantwana abanengi.
Ngalokhu-ke kungumbono woMthunywa ukuthi nga uzulu esebenzelana lenhlangothi ezibona ngamalungelo abantwana ukuze zonke izigilamkhuba ezidlova abantwana zibanjwe zibuzisiswe ukuthi kungani zisenza lokhu.
Zitsho lokuthi kusilelani andubana zijeziswe.
Phezu kwakho, kuqakathekile ukuthi uzulu azinike umlandu wokulondoloza amasiko lobuntu babo ngokumelana lemikhuba engcolileyo njalo ebulala isizwe njengalo.
