adminSESINGENILE kumnyaka ka2016, kuyabongeka ukuthi siwubonile lumnyaka. INkosi mayibongwe nsuku zonke ngalokhu esenzela khona. Njengenjwayelo siya sikhangele ukuthi umnyaka esiwugqibayo ubusiletheleni, ukuthi sisebenze njani kanye lokuthi kuyini esifuna ukukutshintsha ngezimpilo zethu kumnyaka esikhangelane lawo.
Umnyaka ka-2016 ufika nje isizwe sikhangelele okunengi kulumnyaka. Kusikhatshana esedluleyo kubekhona inguquko ezibekhona ezifuqwe nguDokotela Grace Mugabe zokuchothoza ubugwelegwele phakathi kwabakhokheli bethu okulethe ithemba elitsha ebantwini. Kungakho-ke sikhangelele ukuthi abakhokheli bethu baqhubeke besenza umsebenzi omuhle njalo benze okungcono ku-2016 okuzakwenza ukuthi impilo zethu zibelula.
Sikhangelele njalo ukuthi benze izinqumo ezizakwenza ukuthi iZimbabwe isukumele phezulu njalo izigqaje.
Sesifikile isikhathi sokuthi balahlele khatshana ukuzicabanga bona bodwa lezimuli zabo bakhangele iZimbabwe ngoba yibo abaliphetheyo ilizwe njalo yibo abalawo amandla okutshintsha isimo sezomnotho kuleli.
Kunengi njalo okunye esikukhangeleleyo njengelizwe, njengoba nje izulu lilokhu lingakani endaweni ezinengi zelizwe kusobala ukuthi indlala izazithaphuzela kuzizalwane zakuleli. Sithanda ukukhuthaza abakhokheli bethu ukuthi babone ukuthi abantu bayathola ukudla ngoba phela kwezinye indawo sizwa kuthiwa abantu sebeqalisile ukudla ngemva kwensuku ezimbili ngoba ukudla sokulilihlo lentwala kulezondawo abakizo.
Sikhangelele ukuthi uHulumende aphathise abantu njalo abone ukuthi labamabhizimusi abacini bekhweza intengo yokudla ngoba bebona ukuthi akukho abantu abangakwenza ngoba befuna ukudla.
Okunye esikukhangeleleyo lonyaka yikuthi njengoba amaMighty Warriors ephumelele ukuthi ancintise kumncintiswano wama-Olympics okwakuqala ngqo lonyaka ngenyanga kaNcwabakazi eBrazil siwafisela inhlanhla.
Lonyaka njalo sikhangelele ukuthi amaWarriors lawo aphumelele okwesibili ukungena kumncintiswano weChan lawo siziqhenye ngawo umnyaka usiyaphela ngokuphakamisa uphawu lwelizwe lakithi.
Yebo bebukhona ubunzima kumnyaka odluleyo ezimulini, ezimpilweni zethu lasemisebenzini njalonjalo. Kodwa ithemba kalibulali silakho ukwethemba ukuthi umnyaka lo uzakube ungcono kuzo zonke impilo zabantu bosapho lwakithi. Lokhu sikutsho nje ngoba kuyindlela yokuqinisa abantu amadolo ukuthi ubunzima bonke ebesibhekane labo bungaphendulwa yikusebenza gadalala kwakhe wonke umuntu elizweni ku-2016 njalo inengi likhangelele ukuthi thuthu empilweni.
Kwabanye umnyaka lo siwukhangelele ukuthi ubengumnyaka lapho esizasungula izinhlelo ezizakwenza impilo zethu lezalabo abaseduze lathi zibengcono. Kuthi-ke kwabanye kufana lokuvula isahluko esitsha empilweni. Kungakho-ke u2016 siwukhangelele ukuthi ube ngumnyaka olethemba, ubungcono kanye lokuthuthuka.
Silifisela umnyaka omutsha omuhle njalo olokuthokoza.
Online Reporter