Online Reporter
Ukugamula izihlahla yikubulala imvelo kunye lelifa ebesilakho ukulitshiyela izizukulwane zethu. Inyamazana zona eziphila kuleliganga zisuka zibaleke kuleli ziyecatsha emazweni aseselemvelo elondolozwayo.
Kuyadanisa ukuthi kulabantu abaqakathekisa inzunzo yelanga elilodwa bangakutshayi indiva ukuthi kulekusasa okumele lalo lilungiselelwe lamhlanje.
Uthola umuntu egamula izihlahla egwaba ngemali ayitholayo nxa ezithengisa.
Kumbe njalo uthole umuntu esenze umnyaba ofika le ngenkuni ezimanzi kwazise yizihlahla eziqunywe zaquntwa amahlamvu.
Kambe indawo ingabukeka ithini ingela ngitsho lesihlahla esisodwa. Khona umhlabathi ungavunda kanjani. Sikhuluma ngokuganyulwa kwezihlahla nje ngoba sesingena phakathi kwawo umqando.
Yebo emaphandleni basebenzisa inkuni ukupheka kunye lokuzikhudumeza ngesikhathi sebusika kodwa lokho akutsho ukuba izihlahla sokumele ziganyulwe mahlayana nje.
Lezinsuku sekwaqala ibhizimusi lokuthengiswa kwamalahle lalo eselibangela ukuganyulwa kwezihlahla ngamandla endaweni zemaphandleni kutshiswe inkuni lezo ukuze kutholakale lawomalahle okuthengisa. Okudanisayo yikuba ziyaganyulwa izihlahla kodwa akuhlanyelwa ezinye.
Abanye njalo ngabatshisa amadlelo kungabi ndaba zalutho. Pho izifuyo zidleni nxa amadlelo kungasela?
Kungumlandu womuntu wonke ukuthi alondoloze imvelo ngoba phela ingeyethu. Nxa umuntu angabona yiloba ngubani elumathisa amadlelo kuhle aphange azise abomthetho ukuze abotshwe ngoba vele imililo yendle ivame
kusukela ngenyanga kaNcwabakazi kusiya kwekaMfumfu ngoba utshani buyabe sebomile kanye lezihlahla njalo kuyabe kulomoya.
Mhlawumbe inengi lalezi zigangi alazi ukuthi kulicala elikhulu ukutshisa amadlelo ngoba lokhu kuyingozi hatshi ebantwini kuphela kodwa lakunyamazana zendle.
Bakhona njalo labo abathi bangawadla amabele basuthe basuke banakane ukuthi umhlaba ngowabo. Uthola belahla izitompi zegwayi bengazicitshanga zisuke zilumathise utshani. Kuhle-ke ukuthi umuntu nxa ebunathile utshwala angabambi igwayi ngoba kuyingozi.
Otsheketsha abaphatheke kulo umsebenzi okungekho emthethweni labo sebebangele ukugugudeka komhlabathi. Izulu lithi nxa lingabuya umhlabathi uthanyeleke uyebuthana ndawonye, uthole izilimo seziswabile nanku phela ziyabe zihleli emhlabathini ongela kudla okweneleyo.
Kuqakathekile-ke ukuthi njengezizalwane zalelilizwe sibambane izandla ekuthuthukiseni imvelo yethu sigwabe ngayo kuzethekeli eziza elizweni kukanti njalo ngasikhathi sinye sithole imali yakwamanye amazwe.
Kungumlandu wethu njalo ukuthi izizukulwane zethu zithole ilizwe leli libukeka njengalokhu lathi salithola lilihle kubokhokho bethu.
Kasilwiseni izigebengu zona-ke ezisuka zikhangele isamba sazo kuphela.
Nxa singalondoloza imvelo yethu silakho ukwethekelelwa ngabantu abavela kwamanye amazwe ngoba lenyamazana zendle esilazo siyabe sesizilondoloza egangeni lapho ezihlala khona.
Lokhu kutsho imali enengi evela kwamanye amazwe, nxa singaqala ukulondoloza imvelo kusukela khathesi.
