Online Reporter
SOKUKANENGI sisizwa ngamadoda afulathela imizi yabo esiyahlala kwezinye indawo ezesabekayo. Abantwana basale besidla ingqweqwe zomlomo, bedubeka umholo wonke wendoda ususiya lapho asefihle khona ikhanda.
Le yinto eyenzakala mihla yonke, akula kuthula kweminye imizi ngenxa yamanye amanina angela nhliziyo kodwa afuna ukuchitha imizi yabanye kulokuthi labo bazidingela eyabo imizi.
Ngumama onjani kambe olesibindi sokuchitha umuzi womunye umama?
Minengi imizi edilikileyo ngenxa yabomakhwapheni, indoda ivele ikhohlwe ngemuli yayo imali yonke singeyokulungisa inwele lenzipho zikamakhwapheni, umuntu eziyenga esithi umakhwapheni ungiphethe kuhle ukudlula umkami.
Yebo uzakuphatha kuhle, ungadli lutho olubabayo ngaphandle kwebilebile ozifakele lona ngoba kukhona akufuna kuwe, uzakumunya njengomkhaza akuqede du adlulele phambili wena umuzi suchithekile.
Abanye ngabathandana lamadoda abantu bekwazi ukuthi balemizi, uyabe usithi wenzani kambe nxa uchitha umuzi womunye?
Abesephelile kambe yini amadoda emhlabeni wonke uze uyeqoma umnikazi womuntu ukwazi.
Abanye vele umuntu lenhliziyo ayikho, loba sezwile ukuthi umuntu athandana laye uthethe uyaqhubeka kuphela aze abe lesibindi sokukhuluma lonkosikazi aze athi umkakho lamuhla ungapha kimi ungazihluphi ngizamgcina.
Yikho ohle ubone khona ukuthi umuntu lobuntu abukho sibili ulengqondo zokubhidliza kuphela.
Yikho okuvela khona ke lapho othola umakhwapheni setshaywe waze wayavukela esibhedlela ngumama womuzi, sebengasolwa bona omama ngokusebenzisa udlame kodwa hatshi okunye liyazenzela lani.
Abanye ngabayabe sebebhoda ngezinyanga ulunyoka soluthe nama suthole umuntu okhiyiweyo ngento zokuganga.
Lani bomama ezindlini lapha phathani kuhle obaba, ziphathe njengalapho esakubona useseyintombi.
Ungathi ngoba sekuthethe uthi sokwanele ngisazihluphelani ngokugeza lokuzicomba, bayahluthuna omakhwapheni usale ubambe isisila sejuba.
Kuhle ukwazi ukuba indlela omthole ngayo yiyo njalo azahamba ngayo wena usale usuvule amehlo.
