Online Reporter
AKULAMZALI opha umntanakhe izinto abona ukuthi ziyingozi kumbe azimlingananga. Abazali banika abantwababo lokho ababona kubafanele, ngeke umzali aphe umntwana into ezamlimaza, ezamenza abe yinhlekisa kwabanye abantwana, akwenzakali lokho.
Kungakho lathi njengabantu siphila emhlabeni uMdali ngeke asiphe okungasifanelanga, lo lalo uphiwa okumfaneleyo, kulesizatho kungani wena wadalwa uyilokho oyikho khona. Umuntu angasoli lokho akuphiweyo, ngoba yikho okumlingeneyo.
Sokuvamile ukuba sizwe ngabantu abakhetha ukuzitshintsha ubulili babo, uthole umuntu ozelwe engowesilisa esephenduke waba ngowesifazane qho, okokuthi nxa engasatshongo ukuba wazalwa engowesilisa, nxa umkhangele kawungeke ukuphuphe loba sekutheni. Okubuhlungu yikuba umuntu uyabe kambe esesoleni ngalokhu uMdali akhetha ukuba abe yikho khona.
Abantu kumele bamukele lokho abadalwa beyikho khona, asibunjwanga safanana bakithi, yena owathi ukuba ngowesifazana kungcono kulokunye ngubani.
Sonke sadalwa sehlukana ngesizatho esiqinileyo uMvelingqangi ayesifisa. Khona kambe abazali bakho uthi bathini nxa sebekukhangele besazi mhlophe ukuba bazala umntanabo engowesilisa esephenduke waba ngowesifazana. Uthi bawubheke njani umhlaba ngoba lapho abahamba khona bayabe befisa lokuba aluba umhlaba uyavuleka ubaginye ikakhulu kungavele kukhulunywe ngabantwana.
Kuyingozi ukuzitshintsha ngamaphilisi lamajekiseni ube ngokunye, yebo okwakhathesi kungabe kungakabonakali ingozi zakhona ngoba asebekwenzile akukho oselimele kodwa-ke kuyenzeka ukuba ngokuya kwesikhathi uswele leyomali yokuthenga lezo zinto, nxa usuyiswela imithi le uzabona iziga.
Kambe ungabe usakuthanda nxa usunjalo na? Kumele uzithande wena ngokwakho unjalo hatshi ukuba ufune ukuthi umuntu athande okungayisikho okwendalo yakho, ngoba ezakuthanda esithi ungowesifazana kanti wena ukwazi mhlophe ukuba ungowesilisa.
Mthwakazi, singabantu abansundu, asizigqajeni ngobuyithi bethu hatshi ukuthathwa ludumo lwemazweni aphetsheya ukuthi mina ngendalo ngingowesilisa kodwa mina ngizizwa ngingowesifazana. Singagijimisi isimanje manje sobutabane osebukhona phakathi kwabantu.
Umuntu kutsho uyabe sesola ukuthi uNkulunkulu umdale njani, usolani we muntu, bonga lokho odalwe waba yikhona, ubonge lempilo oyiphiweyo, hatshi ukutshona ugijimisana lokuziguqula ubulili bakho.
Kungakho kuqakathekile ukuthi umuntu ngomuntu amukele lokho ayikho khona, kulesizatho sokuba kungani uNkulunkulu wakudala njalo.
