Online Reporter
Abadala babethi nxa bekhuza bathi akuqili lazikhotha emhlane. Amazwi la awasilo izaba kodwa aqinisekile njengoba siwabona egcwaliseka imihla yonke kulabo abenza okubi becabanga ukuthi ngeke babonakale, kuzaphelela lapho.
Sekuyimvama ukuzwa ngabantu abehlelwa yizehlakalo ezibuhlungu abangazikhangelelanga ngemva kokona. Okunye sesike sakubala emaphephandabeni, sakubona kumabonakude lakunkundla zokuxhumana kukanti okunye siyakubona ngamehlo kusenzakala emizini esihlala kuyo.
Lezinsuku phose malanga onke kuba labathengisa izidakamizwa ababotshwayo. Izenzo zalaba bantu sezitshaye kwazwela kumpilo yabatsha bethu nanko phela banengi asebephanjaniselwe impilo zabo ngenxa yokuphatheka ekuthatheni izidakamizwa abazithengisayo.
Izigangi lezi ezithengisa izidakamizwa inengi lazo bezibona angathi zihlakaniphile ngeke zibanjwe, kanti ke hayi bo okulempondo akufihlwa emgodleni.
Lezinsuku amapholisa ahlala ethiye indlebe futhi eqaphe ngelokhozi okuyikho osekusenza kungedluli insuku ezimbili kungabotshwanga izigangi lezi.
Kunengi okwenziwa ngabantwabethu nxa sebedakwe yizidakamizwa lezi. Abanye sikhuluma lamhlanje bakogoqwanyawo ngenxa yokuthatha izidakamizwa.
Kusobala ukuthi labo abenza ukuganga okufana lokuthengisa izidakamizwa kumele bajeziswe ukuze umkhuba lo wokuthengisela abatsha izidakamizwa uphele du emphakathini.
Kuyadanisa ukuba abantu laba kabakhethi nxa bethengisa izidakamizwa lezi. Kungafika umntwana oleminyaka elitshumi ezothenga kabakutshayi indiva ukuthi ulokhu esanuka uchago emakhaleni kodwa bayamthengisela izidakamizwa. Ukuthi zizaphambanisa njani impilo yakhe bathi lokho ngokwakhe labazali bakhe, bona abakufunayo nje yimali abayitholayo.
Kuyinto embi ukuthi umuntu aziqhenye ngokuthi wenza imali ngokuthengisa into etshabalalisa impilo zabanye abantu.
Kungumbono waleliphephandaba ukuthi umuntu munye ngamunye kumele abe lipholisa lezenzo zakhe, lapho ebona ukuthi usezakwenza iphutha aphange azibophe yena ngokwakhe.
Abantu abazikhuthaze ukwenza okuqondileyo ngaso sonke isikhathi. Umuntu wonke aziphe umlandu wokuzelusa lokuziqondisa kungadingeki amapholisa kumbe umuntu ukuze ekele ukwenza izinto ezimbi.
Ingozi yokubalisa ngokwekela ukwenza okubi yikuthi ucina uwele egodini ungakalitholi ithuba lokutshiya ububi bakho.
Kungakho sizaqhubeka sitshumayela ivangeli lokuthi abantu kabaxekane lokuthengisa izidakamizwa ngoba kuvele akubhadali, umvuzo wakho yikuyabolela ejele.
