admin
KULEZINSUKU ayisizo zigigaba ezenziwa ngabafundisi abatshiyeneyo emabandleni. Uthola abantu belanda umfundisi obenza izinto ezingaqedakaliyo uzibuze ukuthi bayabe bezithethe bazibeka ngaphi ingqondo ngesikhathi besenziwa yonke imithanithani engaqedakaliyo le.
Kuyonale iviki sizwe ngomfundisi wakweleSouth Africa okubikwa ufuthela abantu nge-Doom ebusweni. Kuminyaka njalo edluleyo kukhona abanye abaphurofethi abenza okunye njalo okuyisimanga emphakathini. Omunye wenza abazalwane badla utshani kwaba angathi abazalwane sebezinkomo ezisemadlelweni. Abanye babelaliswa phansi umfundisi abesezihambela phezu kwabo sangathi bayikhaphethi yakhe.
Abanye njalo babedliswa inyoka ezincane kuthiwe ziyitshokoledi. Hayi umhlaba lo ususiya emaphethelweni impela. Inhlupheko lokuswela kwabantu abamnyama kwenza kubemnyana lengqondo, izihlakaniphi zicine sezidlala ngabo.
Ukuba buthakathaka kwabantu abamnyama kubenza babambelele kuzo zonke izinto ezingayisizo. Kulabakade besithi umfundisi wokufuthela abantu nge-Doom kabotshwe ngokusebenzisa lesi sibulali zinanakazana ukwelapha abantu, kodwa iqiniso yikuthi yiloba edlala ngabantu, yibo abantu abazizela enkonzweni yakhe.
Angikaze langelilodwa ilanga ngizwe kuthiwa laba bafundisi abalanda abantu bababambe ngamandla ukuthi baye enkonzweni zabo kodwa bahamba ngobunengi besiyafuthelwa ngokubulalayo.
Kodwa ngaso sonke isikhathi yibo “abazalwane” abaya ezinkonzweni belanda zona lezi zinto ngoba bethanda izimanga eziphangisayo.
Abakhokheli kuHulumende kumele balandele abafundisi bomgunyathi abathatha amathuba ngokuhlupheka kwabantu babenze izichaka nje ngoba befuna ukuzakhela udumo ngento engekho. Kambe nxa abantu bezaphathwa njengezinanakazana ezifuthelwa ngomuthi wokubulala zona izinanakazana kubizwa kuthiweni? Nxa ungumuntu olengqondo esebenza kuhle, ngeke wavuma ukufuthelwa nge-Doom, noma udliswe utshani, ngitsho noma ngabe kuthiwa umethemba njani umfundisi wakho. UNkulunkulu ngeke adlala ngabantu kanje.
Abantu kumele bakunanzelele ukuthi kukhona abafuna ukubasebenzisa ukuze bazakhele udumo kumbe benze imali hatshi ukuhamba bengena amabandla enza izinto ezibenza bacine behlekwa ngabantu. Abantu abahlakaniphe, kuyacina kuthiwa badle ingcekeza yabo khona bezasinda. Asekeleni ukwenza izinto ezizakwenza abantu babone angani kumnyama nje engqondweni zethu.
Online Reporter