admin
YiNtatheli kaMthunywa
KULANDELA udaba oluke lwaphuma kuphephandaba leli kumaviki amabili adlulileyo ngomunye u-elder webadla leSabatha owanikela izinto zakhe zobuthakathi ukuthi zitshiswe sekuvele ukuthi usexotshiwe ebandleni leli ngoba kukholwa ukuba ungcolise ibaizo lebandla ngezenzo zakhe, uMthunywa ongelampontshi uyakuveza egcekeni lamhlanje.
Kubikwa ukuthi amalunga ebandla leGwenzi avumelane ukuthi umsolwa uSizondo Pambana Ndlovu akusamelanga abe ngumkhokheli webandla ngenxa kokuganga lokhu.
Omunye wabakhokheli beGwenzi ongathandanga ukuqanjwa ngebizo uveze ukuthi uNdlovu waqalisa kudala ukuhlambalaza ibandla ngokuganga.
“Akusethusi njengamalunga ebandla ukuxhwala kukaNdlovu ngoba kudala saqala ukukuzwa. Kuminyaka emibili edlulileyo wake wabanjwa i lonkosikazi womunye umzalwane wahlawuliswa inkomo. Khathesi omunye undoda wafulathela umuzi wakhe ngemva kokukhanda uNdlovu lonkosikazi wakhe bezincindela uluju lwemvelo.
“Sibone ukuthi ngeke ibandla liqhubeke lilomkhokheli onje kungcono amiswe ebandleni uzaphenduka angaguqula izenzo zakhe,” kutsho ilunga lebandla.
Ekhuluma Ientatheli zindaba uNkosazana Lydia Dube uveze ukuthi ukuganga kukaNdlovu sekuke kwakhulunywa endaweni ezinengi kwehlula ngoba kucatshangelwa ukuthi sewaqalekiswa.
“Sicabangela ukuthi ukuganga kwakhe bekulokhe kumbambathwa ngoba engumfowabo kamfundisi njalo engumuntu omdala esigabeni. Abanye bathi ukuganga lokhu kwavela kudala kodwa bebesesaba ukungcolisa ibizo lebandla,” kutsho uNkszn Dube.
Imizamo yokuxhumana lometheswacala yehlule ngoba ucingo lwakhe lungabanjwa muntu kwaze kwafika isikhathi sokudindwa kwephephandaba. Umfundisi webandla walile ukuphawula ngalindaba ethi isixabanise abantu njalo ukukhuluma ngayo kungenza ihlazo leli lingaphumi emakhanda abantu.
Online Reporter