Online Reporter
Nkosilathi Sibanda
OSOMABHIZIMUSI besifazane bakuleli bazahlanganisa amakhanda, besabelana ulwazi lamaqhinga okuphakamisa amabhizimusi abo lomkhonomi welizwe kumbuthano weWomen’s Conference ngoMpandula koBulawayo.
Umbuthano lo, ozadibanisa osomabhizimusi lamankampani akulelidolobho, uzabe ungowakuqala owaloluhlobo oqhutshwa esabelweni sakoBulawayo. Kubikwa First Lady uMama uDokotela Auxillia Mnangagwa uzabe enguMhlonitshwa omkhulu kulumhlangano.
Uqoqwe lugatsha lweProvincial Affairs leDevolution koBulawayo, lubambisane lekhansili yedolobho njalo uzaqhutshelwa enkundleni yeZimbabwe International Trade Fair (ZITF) kusukela mhlaka 3 kusiya kumhlaka 5 Mpandula.
UMphathintambo weProvincial Affairs leDevolution koBulawayo uJudith Ncube ubike ukuba umbuthano lo uhlose ukuphakamisa abesifazane abakumabhizimusi.
“Ngiyajabula ukulazisa ukuba sibambene leCity of Bulawayo, sizaqhuba umbuthano wamalanga amathathu oweBulawayo Women Investment Conference 2025.
“Singavakatshela kwamanye amazwe, siyafunda okunengi, esibona kumele sikwenze lathi kwezengqubekela phambili yamabhizimusi. Sifuna ukuphakamisa omama abakumabhizimusi koBulawayo. Sinxusa bonke osomabhizimusi ukuthi baze ngobunengi,” kubika uMphathintambo uNcube, ngesikhathi ekhuluma lentatheli mayelana ngombuthano lo.
Ubike ukuba ngaphandle kokwabelana lokuthapha ulwazi, osomabhizimusi bazakwakha ubudlelwano obuzaphathisa kwelakusasa emisebenzini yabo. Kubikwa kuzabekwa lembukiso yamabhizimusi atshiyeneyo.
“Ngalumhlangano, sifisa ukuthuthukisa abesifazane ngokubanika amathuba, ulwazi kunye lokuxhunyaniswa okudingakalayo, okuzakwenza kube lula ekuthuthukisweni komnotho wakoBulawayo.
“Njengoba sisebenzela ukuzuza isimo somnotho wesigaba se-upper middle class ngeVision ka-2030, ukubeka imali emandleni omnotho wabesifazane kubalulekile ekwakheni ikusasa lapho abesifazane abazabe bekhokhela kungqubekela phambili yelizwe.”
