Online Reporter
YiNtatheli kaMthunywa
OWAKE wadlalela amaWarriors leCAPS United, uTumirai Matsika, owayedume ngokuthi nguBrian Abbas Amidu utholakale elembanje eziyisilinganiso se-780 kilogrammes, ezibiza i-US$78 000.
Umiswe phambili kukaMantshi weKwekwe ngoMvulo esetheswa icala lokuphatha izidakamizwa. Umdlali lo, oleminyaka yokuzalwa engu-29, ubotshwe lomunye uKudzai Mhlanga (41) owaziwa ngelinye ibizo elithi Rueben Mhlanga.
Abatshutshisi bodaba babike ukuba leli ngelinye lamacala amakhulu esabelweni seMidlands lonyaka. UMatsika, ngokutsho kwamapholisa, usebenzisa amabizo amanengi njalo ulamanye amacala awatshitshela emthethwandaba. Kubikwa ekuqaleni athole imbanje eziyi-750kg, yasitshintshwa isiya ku-780kg, okuyikhona osokudale ukuthi kube lemibuzo.
Ngokutsho kweNational Prosecuting Authority of Zimbabwe (NPAZ), amapholisa athole udletshana lokuthi abasolwa babehambisa imbanje besuka eKwekwe besiya eHarare. Amapholisa abacathamela emgwaqweni osuka eKwekwe usiya eKadoma.
“Babanjwa befaka amasaka embanje phakathi kweHonda Fit Shuttle,” kutsho umbiko okhitshwe yiNPAZ.
“Ngokuhlolisisa imota, Amapholisa athole amanye amaphakethi embanje angu-75.”
Kubikwa abasolwa babejwayele ukusebenzisa amabizo abo eqiniso nxa besezandleni zamapholisa, ngenjongo yokuthi bengabanjwa lula nxa bedala amacala.
Abatshutshisi batshele inkundla ukuba uMatsika ulamacala amabili afanayo awenza e-Epworth eHarare (EPW 407/25 and CR 636/03/25).
Abasolwa baphenduka emthethwandaba ngoLwesibili ukuzocela ibheyili.
