Online Reporter
YiNtatheli kaMthunywa
KULOMFANA osakhulayo we-Epworth ozibuleleyo ngoLwesithathu ngemva kokumithisa intombazana eleminyaka engu-17.
UTanyaradzwa Minau (19) we-Overspill utholakale elenga ephahleni ngakibo ngumnawakhe oleminyaka engu-11 emini enkulu.
“Umnewethu wangithuma ezitolo ngithe ngiphenduka, ngamthola esefile.
“Ngasuka ngayabikela ubabakazi,” kutsho umnawakhe lo kungxoxo lentatheli.
Abazali babo babeye emsebenzini uRimau ezibulala.
Abafakazi baveze ukuthi uRimau wabona kungcono ukuthi azihilele ngemva kokuba uyise emxotshe ngakibo ngoba emithise intombazana eleminyaka engu-17 yakule indawo.
Ngemva kokuxotshwa ngakibo, uTanyaradzwa wasuka wayahlala lenina elilabantwabalo ababili eSolani area khona Epworth.
Kodwa wabuye waxotshwa okwamenza wabuyela ngakibo wayazibulala.
“Waxotshwa linina ayesehlala lalo, wabuyela ngakibo kodwa uyise waphinda wamxotsha.
“Waphenduka ngakibo esebona ukuthi abazali bakhe sebeye emsebenzini, wazibulala,” kutsho uyisekazi.
Uthe umfana lo ubesephatheka kuzidakamizwa obesekuphambanisa izinqumo azithathayo.
Uyise kaTanyaradzwa, uTrymore Rimau uthe wamxotshela ukungaziphathi, okugoqela ukumithisa inkazana, ukungamhloniphi kanye lokungalandeli imithetho yangakibo.
“Ubengasabuyi ngekhaya, ubesehlala ezitaladeni, ekuphendukeni kwakhe ubesehlupha, ngenxa yalokho ngamxotsha,” kutsho uRimau.
Ichwayisiso luyaqhubeka.
