Online Reporter
YiNtatheli kaMthunywa
UKHANSILA wakoBulawayo uTavengwa Zidya usebike ngokudana ukuthi idolobho lamaKhosi seliphenduke laba yindawo egcwele ubugebengu nanko futhi sekwande abantu abathengisela utshwala ezimoteni, abanatha utshwala emphakathini labanye abazikhulula yonke indawo.
UZidya ngukhansila kaWard 24, egoqela iNketa 7, Nketa 8 le 9, aphinde abe ngusomabhizimusi enzikini yedolobho.
Uthe ukhathazekile ngokubona ukwephulwa komthetho ilanga libalele. Ukhalaze njalo ngokuthi amabhizimusi asemthethweni aselahlekelwa yinzuzo labathengi ngenxa yokwanda kobugebengu kanye lokuthengiswa kotshwala okungekho emthethweni.
“Izitolo ezisemthethweni njengama-Bottle store sezilahlekelwa yibhizimusi ngenxa yabantu abathengisa utshwala ezimoteni, phambi kwalezi izitolo. Abanye ngabalahla amanzi ezihlahleni, emikotweni lasemakhoneni enzikini yedolobho. Isenzo lesi sibi kakhulu.
“Yikho nje amabhizimusi esesuka enzikini yedolobho esiya eSuburbs laseKhumalo. Ngokuya kwesikhathi, nxa ubugebengu buqhubeka, kuzakuba lamabhizimusi azaphuma enzikini yedolobho,” kutsho uMnu Zidya.
Ukhansila lo uncome amapholisa eZimbabwe Republic Police (ZRP) ngomsebenzi wabo wokulwisana lobugebengu.
