Online ReporterLovemore Dube
OWAKE wagijimela iNational University of Science and Technology (Nust) uNyasha Charandura, ukhumbule ekhaya ngokunikeza isipho kunyuvesi le, aqeqetsha kiyo.
Wethule isipho samabhola angamatshumi amathathu lempahla zokugqoka.
Ngalokhu uthe uhlose ukukhuthaza abasakhulayo ukuthi bazame ukulungiselela ikusasa labo kwezemidlalo.
UCharandura useleminyaka elitshumi wasuka eNust lapho alolongwa khona kuzifundo zeSports Science, ezimenze waba ngomunye wabahloniphekayo eNingizimu Africa.
Okwakhathesi usebenza ku-Azam FC eTanzania, encedisana labaqeqetshi.
IConfederation of African Football (Caf) isibone ubungcwethi bomsebenzi wakhe, nanko isimsebenzisa ekulolongeni abaqeqetshi abenza izifundo zeCaf A, B, C loD.
Usehambe amazwe ambalwa esebenza layo iCaf ephakamisa ifulegi yeZimbabwe.
Utshele iphephandaba likazulu ukuba kubalulekile ukuthi umuntu akhumbule lapho avela khona.
Uthe iNust yamupha ithuba lokuthi abengumuntu njalo laye isifiso yikuthi azame ukuvulela abanye amathuba, bahlume.
“Ngifunde eNust ngaphuma le-degree leSports Science. Ngithe sengiphandle lami ngabamba lapha lalaphaya ngacina ngivulekelwa ngamathuba amanengi.
“Ukuza lapha eNust yisibongo engisiphayo kundawo le ngoba yangenza ngabangumuntu lami. Nxa ngikhuluma loba ngisebenza kwezemidlalo, abantu bayalalela,” kutsho uCharandura ekoBulawayo ngoLwesithathu.
Umqeqetshi lo okwakhathesi uhlala eTanzania.
Useleminyaka eyisithupha esebenza khona njalo uyahlonitshwa okwamagama, okokuthi usesenza lokhu okuthiwa yi-consultancy, ukwabela ulwazi.
Loba eqhatshwe liqembu leAzam, uCharandura uphinda asebenze kunhlanganiso yeTanzania Football Federation ephathisa amaqembu ebhola akulelo.
Uthe ukuba seTanzania lakwamanye amazwe kumfundise okunengi ngeSports Science, ebalisa ukuba indlela ibhola lenyawo eliqhutshwa ngayo, kulandelwa kakhulu inhlelo zakulezinsuku.
Inyuvesi yeNust ileqembu lenguqu elidlala kumaligi aphansi kwenhlanganiso yeZimbabwe Football Association. Iqembu leli liyancintisa lakumidlalo yezikolo zemfundo yaphezulu elizweni.
