Online Reporter
Ethel Ncube
KULOMFUNDISI webandla le-Apostolic Faith Mission (AFM) osekhitshelwe incwadi yokubotshwa ngecala lokudlwengula umntwana oleminyaka engu-13 yokuzalwa.
Umantshi weMasvingo, uMnumzana Innocent Bepura ukhiphe incwadi yokubopha umfundisi lo, uChirashanye Magora oleminyaka engu-53 yokuzalwa osebenza eMucheke eMasvingo osolwa ngecala lokudlwengula.
Kubikwa uMagora obephandle ngebheyili, ubengabonakali enkambeni yamapholisa ngesikhathi esabekwayo, kusukela mhlaka 8 Mbimbitho 2026.
Ibheyili kaMagora kubikwa ibisithi kumele ayevela enkambeni yamapholisa ngoMvulo kunye langoLwesine kodwa ubengasakwenzi lokho. Kubikwa lesontweni kasabonakali futhi.
Umtshutshisi, uMnumzana Liberty Hove uveze ukuba umfundisi wetheswa amacala amabili okudlwengula.
Kuzwakale ukuthi ngelanga elingaziwayo ngoZibandlela, ngomnyaka ka2025, umamangala wavakatsha komfundisi elonina, bafika bamtshiya khona.
Umsolwa wasethuma umamangala endlini, uthe esephakathi wamlandela wafika wavala umnyango wathi kahlubule impahla andubana amdlwengule.
Wabuye wamethusela ngokumbulala nxa engalokotha abikele umuntu ngesenzo lesi.
Kubikwa kuhlandla lesibili, umamangala wayethunyiwe komfundisi, wathi kalale emzini wakhe ukuze ngosuku olulandelayo angene inkonzo, kanti yena uthi siphundu kawuboni, ufuna ukumhlukuluza ebusuku. Phakathi kobusuku, wahamba lapho okwakulele khona umamangala wafika wamhlukuluza.
Umamangala ephaphama wazama ukuhlaba umkhosi kodwa umsolwa wamvala umlomo wabuye wamethusela ngendlela efana leyakuqala.
Kubikwa mhlaka 16 Nhlolanja 2026, umsolwa wabizela umamangala endlini yakhe, kodwa wabaleka waya esikolo lapho afika wabikela khona umphathisikolo.
Umphathi wamqhuba waya laye emapholiseni, okuyikho okwabangela ukuthi uMagora abotshwe.
