admin
YiNtatheli KaMthunywa
Kungahle kube yisizini yokucina ukubonakala kunguqu empilweni kaFarai Mujokoro owayengumsekeli kamqeqetshi kuqembu leBulawayo City.
UMujokoro usetshelwe ukuthi engalugxobi kwezenguqu okweminyaka emihlanu elandelayo.Lokhu kutsho ukuba umqeqetshi lo nxa efuna ukuqhubeka ekhuza abadlali, uzakwenza lokhu ngesizini yomnyaka ka2021.
UMujokoro utholakale elecala lokubheja lokuqilibezela umdlalo owawuphakathi kweBulawayo City leBorder Strikers kuhlandla lesibili lesizini yeCastle Lager.
Ngokunjalo, iqula eliphatha izijeziso kunhlanganiso yePremier Soccer League lithumele uMthunywa imeyili lisethula isigwebo esiphiwe uMujokoro lomunye wakhe kuBulawayo Chiefs uGift Mvala.
UMvala nguye obegcina impahla yabadlali beBulawayo City.
Bobabili batshelwe ukuthi bazabhadala indleko zokuthethwa kwaleli cala kungakafiki umhlaka 30 kuLwezi.
“Kusegcekeni ukuthi uFarai Mujokoro loGift Mvala babopha iqhinga lokuyabheja umdlalo, ngakho bephula umlayo ka-31.2.2 ongaphansi kwemithetho yePSL,” kutsho isinqumo esiphawulwe yiPSL.
Umbiko omumethe isijeziso sikaMujokoro lesi uqhubeke wachaza ukuthi iqembu leBulawayo City alilacala.
“Ngokunjalo, sithole uMujokoro loMvala belecala. Iqembu leBulawayo City liyesulwe icala kulokhu ngoba kungela ubufakazi obuninda iqembu kulelicala.”
UMujokoro wabanjwa xhaka ezama ukubambisa unozinti weBorder Strikers uTalent Sande i$300 ukwenzela ukuthi adlise iqembu lakhe. Umdlalo lo wawusenkundleni yeDulivhadzimu mhlaka 3 kuNcwabakazi.
Online Reporter