admin
Cornelius Luphahla
KUZABE kungabizwa ozwayo kuguga othandayo lapho iqembu lomculo kamaskandi iNsukamini Yodumo elizabe likhipha khona idlalade lalo lesithathu.
Umkhosi lo uzakuba khona mhlaka 12 Lwezi kusukela ekuseni kuze kuyelamula ukutshona kwelanga. Emkhosini lo kuzabe kulamaqembu acula imiculo etshiyeneyo angu-24 ngenhloso yokuthokozisa uzulu.
UMthunywa ukhulumisane lomholi waleliqembu uChristopher Ncube wathi ukhuthaza uzulu ukuthi aphatheke emkhosini lo njalo kuzabe kulamaqembu amanengi kakhulu atshiyeneyo.
“Ngikhuthaza uzulu ukuthi abekhona emkhosini lo azozibonela ukudla kwamehlo. Emkhosini lo kuzabe kulabaculi abacula imiculo etshiyeneyo egoqela umaskandi, irumba, i-kwaito kanye labezokholo. Abaculi laba bagoqela
Amabhukudwane, Abafana bakoGodlwayo, Abafana bakaMzilikazi, uMongameli umculi odabuka eSouth Africa, uDumezweni, uEsau kanye labanye abaculi abatshiyeneyo abazaba bethokozisa uzulu eBerea Park kweleSouth Africa,” kutsho uChristopher.
UChristopher uqhubekele phambili wathi idlalade leli abalikhiphayo ngelesithathu njalo lizabe litholakala emkhosini lo.
“Idlalade leli esizalikhipha ngelesithathu. Elakuqala ngelithi Iqhawe lakoMhlahlandlela, kuze elithi Lukhulu luyeza besokusiza leli esizalikhipha elithi Uchakide uchelesile. Lelidlalade lizabe lithengiswa emkhosini lo njalo kuviki ezayo lizabe selitholakala njalo lakoBulawayo kwelakithi,” kutsho uChristopher.
Ekhuluma lentatheli uJunior Ngwenya umholi weqembu laMabhukudwana uthe unxusa umphakathi ukuthi uzobona indumezulu le ezaba khona njalo ulindele ezimnandi.
“Nginxusa uzulu wonke ukuthi abekhona emkhosini lo ngoba kuzabe kuguga othandayo. Thina njengeqembu laMabhukudwana sizajabulisa uzulu ngomculo wethu ngenhloso yokuxhasa iqembu leNsukamini ekwethuleni idlalade lalo.
“Ngalokhu-ke indaba esiza lazo ngezimnandi kuphela, umphakathi uzazibonela ukudla kwamehlo mhla walelilanga,” kuphetha uJunior Ngwenya.
Online Reporter