Online Reporter
YiNtatheli kaMthunwa
KULENDODA edonsele umkayo edale lenduna imethesa icala lobuthakathi ngenxa yomkhuba wokunyamalala phakathi kobusuku endlini yabo yokulala.
Indaba le ivele edale lenduna uMutasa, uEdson Marima wePenhalonga echaza ngezehlakalo ezethusayo esezibangele ukuthi alahlekelwe yimizwa yomkakhe uNhamoyevana Chirumiko.
UMarima uchaze ukuthi ukunyamalala lokhu kuqale mhlaka 15 Nhlolanja, lapho umkakhe uChirumiko athi usefuna izinto ziguquke emtshadweni wabo.
“Wavuka phakathi kwamabili wangibikela ukuthi kasafuni ukulala ndawonye lami. Wathi nxa ngifuna ukuthatha omunye umfazi ngingakhululeka ngenze lokho, ngoba engasenelisi ukusuthisa indingeko zami.
“Wathi nxa ethandana lami uzwa sengathi lidimoni,” kutsho uMarima eveza lokuba lokhu kwamenza wabikela lezihlobo.
Uthe kodwa isimanga kasizange siphelele lapho.
“Ngobusuku obulandelayo phakathi kwamabili, waphuma waya phandle. Ngamdinga, kangizange ngimbone. Kusukela lapho sokungokwansukuzonke.
“Nsukuzonke ebusuku uyaphuma endlini yethu yokulala ayelala emkulwini, ikhanda lakhe libe semnyango. Nxa ngingambiza uvuka ubhova.”
Uthe umkakhe uphenduka endlini yabo yokulala kungedlula ihola lokuqala ekuseni, okuyikuziphatha okwethusayo okuyikho osokubangele ukuthi alethe indaba le edale lenduna.
Uthe lomntanabo laye useveze ukukhathazeka ngemva kokunanzelela izenzo zikanini ebusuku.
“Ngelinye ilanga indodana yami yangitshela ukuthi yabuza unina ukuthi kungani ephuma ekamelweni lethu lokulala phakathi kwamabili. Kuthiwa wathi ubona kulomuntu oyabe emi emnyango ebusuku yikho okubangela ukuthi aphume ekamelweni,” kutsho yena.
Uthe isimo lesi saba sibi umkakhe esesuke emzini wabo eqambe amanga.
“Wasuka esiya ngakibo ethe uyise umtshayele ucingo. Mhlaka 3 Mbimbitho ngatshayela ubabazala ucingo ngimbuza ukuthi uyabuya nini kodwa wangitshela ukuthi uqamba amanga.
“Ngathi sengimchazela ngokwakusenzala ngaleyonyanga, wathi wenza into efanayo lakuye,” wengeza ngokuthi lokhu sokubangela ukungathembeki emtshadweni.
“Ngesizatho salokhu kangisafuni ukuqhubeka ngomtshado lo. Sengihlezi ngisesaba futhi ngididekile. Ngeke ngenelise ukuhlala lomuntu engingazwisisiyo ukuziphatha kwakhe,” kutsho yena.
Kusenjalo uChirimuko ulandule insolo zobuthakathi, wathi ulokuhlukumezeka emtshadweni osekubangela ukuhlukuluzeka lasengqondweni.
“Lokhe ngathathwa yindoda le, ngihlezi ngifuna ukumbalekela. Lo ngumtshado onzima lapho engihlukunyezwa khona.
“Indoda le iyangitshingela ingitshaye. Kangihlalisekanga engqondweni nxa ngilaye eduzane. Yikho ngiphuma ekamelweni lethu lokulala phakathi kobusuku,” wengeze ngokuthi kaselamizwa yomkakhe.
“Kangisayithandi indoda le. Kangisafuni kuba semtshadweni lo ukuze ngibe lokuthula empilweni yami,” kutsho yena.
UChirumiko kazange achaze ngomuntu ambona ebusuku kodwa uthe izenzo zakhe zibangelwa yikuhlukuluzwa.
Induna uMutasa ikhuthaze imuli le ukuthi idinge ukuncediswa emulini. Kumele lihlale phansi lezimuli zenu lizame ukulungisisa indaba zenu.
“Umtshado wakhiwa ngokuzwisisana, nxa kungaba lenhlupho kumele zilungisiswe emulini,” andubana engeze ngokuthi ababili laba kusobala ukuthi balenhlupho ezinzima ezidinga ukubanjwa kuhle.
