Online Reporter
Nkosilathi Sibanda
UMKHOSI waMatshitshi Cultural Festival ozabe usenkundleni yeWhite City koBulawayo ngempelaviki le, yikho lapho okukhangelelwe ukuthi wonke umuntu othanda amasiko esiNtu atholakale khona.
Umcimbi lo, ozaqhutshwa ngoMgqibelo mhlaka 29 Ncwabakazi 2026 kusukela ngehola lokuqala emini, uzahlanganisa imidlalo yesiNtu, imigido, imbukiso yamasiko labaculi.
Injongo yomkhosi yikukhuthaza abantu, ikakhulu abasakhulayo, ukuthi bazi imvelaphi yabo, bahloniphe amasiko esiNtu njalo bagcine amagugu adluliselwa kubo ngabadala.
Umkhosi lo, uyinxenye yomkhankaso wenhlanganiso ye-Sigiya Ngamasiko Ethu, esebenza labaxhasi bomcimbi abagoqela ingatsha zikaHulumende, Khulumani FM, National AIDS Council (NAC) lezinye ingatsha ekukhuthazeni isithunzi, ukuzithiba lokuziphatha ngendlela eqondileyo kwabasakhulayo.
Abaqoqi bomcimbi bathe ukugcinwa kwamasiko kungaba yindlela yokuthi abatsha baziqhenye ngemvelaphi yabo njalo bafunde imikhuba emihle. Kukhangelelwe ukuthi kube lembukiso yemigido yesiNtu lokunye ukuzithokozisa, kuthi abaculi abagoqela uMzoe Seven labanye bathokozise izethekeli.
Umkhosi lo uzaphinda unikeze ithuba lokuthi abadala labatsha bahlangane, lapho ulwazi ngamasiko, imbali lamagugu esiNtu kudluliselwe kusizukulwane esilandelayo.
Abantu bakoBulawayo labavela kwezinye indawo banxusiwe ukuthi bazohlanganyela ekugcineni amasiko abo njalo baxhase imizamo yokulondoloza amagugu esiNtu.
