Online Reporter
Robin Muchetu
UGATSHA lwezempilakahle lokondliwa kwabantwana kuHulumende lubika ukuba sekulabantu abafike i12 000 abatholakala belomkhuhlane we-flu ngeviki.
UNobhala walolugatsha uDokotela Aspect Maunganidze uthe ukuhlolwa okwenziwa eNational Microbiology Reference Laboratory kuveze ukuthi amagcikwane agcweleyo ngawe-Influenza A le-Influenza B njalo akulabufakazi bokuthi umkhuhlane lo ubangelwa yiCovid-19.
“IZimbabwe ibhekane lokwanda kwe-influenza okuhambelana lesimo esijayelekileyo kunyanga zebusika. Imininingwane ekhona iveza ukuthi i-influenza le isibambe abantu phose abangu-12 000,” kutsho uDkt Maunganidze.
Uthe umkhuhlane we-flu ujayele ukufika kuzinga eliphezulu ngoNhlangula langoNtulikazi, kodwa lonyaka uphakeme ngoNcwabakazi.
Lanxa kunjalo, uDkt Maunganidze uthe abantu akumelanga bethuke.
“Lanxa ukuphakama komkhuhlane kuphakame ngendlela engajwayelekanga, akulasizatho sokwethuka kumbe ukukhathazeka kakhulu.”
UDkt Maunganidze uthe sekwedlula abantu abane ngomkhuhlane we-flu kusukela ngoZibandlela 2026.
Ubuye waxwayisa ukuthi i-influenza ingavuselela ezinye izifo umuntu angabe elazo okugoqela i-asthma, tuberculosis, izifo zenhliziyo kanye lezinye izifo ezihlala isikhathi eside.
“Ama-antibiotics kawelaphi i-influenza ngoba ibangelwa ligcikwane, njalo kumele asetshenziswe kuphela nxa ebhalwe yisisebenzi sezempilakahle,” kugcizelela uDkt Maunganidze.
