Online Reporter
Bhekimpilo Tshalibe
INHLANGANISO yeVeterinary Services isixwayise abalimi ukuthi bananzelele izifuyo zabo zingahlaselwa ngumkhuhlane we-tetanus.
UDokotela Maria Jakarasi onguGovernment Veterinary Officer esabelweni seMatabeleland North uxwayise abalimi ukuthi bananzelele izifuyo zabo zingabanjwa ngumkhuhlane we-tetanus.
Uthe umkhuhlane we-tetanus uyingozi ngoba kawuhlaseli izifuyo kuphela.
“Umkhuhlane we-tetanus uyingozi ngoba kawuhlaseli izifuyo kuphela kodwa uyahlasela labantu,” kutsho uDkt Jakarasi.
Uqhubekele phambili wathi umkhuhlane lo ulendlela obonakala ngazo.
“Kulendlela umkhuhlane we-tetanus obonakala ngayo nxa usuthe wahlasela izifuyo. Isifuyo esesihlatshwe ngumkhuhlane lo zingaswela amandla, ukuphefumula nzima, ukuvuvuka kwenyawo, uqhuqho kanye lokukhamisa nzima,” kutsho uDkt Jakarasi.
Uthe umkhuhlane lo utholakala emhlabathini.
“Umkhuhlane lo ubangelwa yizibungwana ezitholakala emhlabathi njalo sikhuthaza abalimi ukuthi bebone ukuthi izifuyo zabo kazikhumi inhlabathi,” kutsho uDkt Jakarasi.
Uthe umkhuhlane lo loba uyingozi kodwa uyavikeleka.
“Sikhuthaze abalimi ukuthi behlabise izifuyo zabo ukwenzela ukuthi zivikeleke emkhuhlaneni lo,” kutsho uDkt Jakarasi.
Uthe umkhuhlane we-tetanus uyelapheka nxa umlimi engaphangisa ukuwunanzelela.
“Umkhuhlane we-tetanus uyelapheka nxa umlimi engaphangisa ukuwunanzelela njalo sikhuthaza abalimi ukuthi bengabona ukuthi izifuyo zabo sezihlaselwe ngumkhuhlane lo bezinike ama-antibiotics,” kuphetha uDkt Jakarasi.
