adminYiNtatheli kaMthunywa
ZIKHUZA imihlola izakhamizi zesigabeni seLutho eLupane ngemva kokuba enye indoda igongode uyisezala ngomphini wekhuba ekhanda wafa kubangwa ubuthakathi.
Isiga lesi senzakale ngoLwesine kuviki ephelileyo. Kubikwa ngalelolanga umuyi uFayo Nyoni wahlasela umkhwenyana wakhe, uTalent Ncube ethi bayamloya lodadewabo, uPrisca Nyoni.
UMthunywa uzwe ukuthi uFayo kunye loNcube besebelesikhathi eside bengabonani ngaso linye.
Intatheli ikhulumisane loMnumzana Liberty Moyo ochaze ukuthi umuyi uNyoni wayehlala etshaya umkhwenyana wakhe njalo ubevele esaziwa ukuthi yisigebenga.
“UNyoni ubethwalise nzima umkhwenyana wakhe ethi uyamloya lomkakhe lanxa nje kucine sokunguye obulawa ngumkhwenyana. Bekuthi nxa ehlangana laye etshwaleni amtshaye uNcube abaleke.
“Kuthe ngoLwesine uNyoni wasukela uNcube wamtshaya emsola ngecala elifanayo.UNcube wabaleka uNyoni wamxotshanisa okomango ongaba yikhilomitha eyodwa,” kulandisa uMnu Moyo.
Wengezelele wathi uNcube wazama ukucatsha ngomkakhe kodwa umuyi waqhubeka emtshaya ngomchilo wenkomo.
“UNcube waqala ebekezela kodwa waze wacunuka wathi lothu wadobha umphini wekhuba watshaya uNyoni ekhanda wawela phansi bamthwalela esibhedlela wayabhubhela eMpilo koBulawayo,” kulandisa uMnu Moyo.
Ekhuluma lentatheli uNkosazana Cynthia Ndlovu oyisihlobo sikamuyi uthe noma uNyoni efile kodwa aluba uNcube kambulalanga bekuzakufa yena ngoba uNyoni ubeyisigebenga.
“UNcube uzincedile ngokutshaya uNyoni noma nje ephambanisile kodwa ngiyakholwa ukuthi kayisikho ayekujongile wayefuna nje ukuzivikela,” kutsho uNkszn Ndlovu.
Unkosikazi kaNcube, uPrisca ebuzwa ngale indaba uthe kuliqiniso ukuthi umnewabo ubebahlupha kodwa uzwa ubuhlungu ngokubhubha kwakhe.
“Kuliqiniso sibili ukuthi umnewethu ubesihlupha ehlala etshaya umkami okuyikho okwenze wambulala kodwa lami kungizwisa ubuhlungu ukutshiywa ngumnewethu,” kutsho uPriscaNkszn Nyoni.
Isikhulumi samapholisa esabelweni seMatabeleland North uSayijeni Namatirai Mashona uvumile ukuthi indaba le sebeyizwile.
“Indaba yendoda ebulele uyisezala sesiyizwile njalo isezandleni zamapholisa eLupane,” kuphetha uSayijeni Mashona.
Online Reporter